1490/2023-2024

Serchhip, the 14th August, 2023 : Vawiin khan Serchhip Auditorium ah Youth-20 Meet on Nationalism, Patriotism & Development neih a ni a. Pu Lalchhandama Ralte, Education Minister chu khuallian a ni.

Pu Lalchhandama Ralte chuan nationalism leh development hi a kalkawp tlat tur a ni a, ram leh hnam hmangaihna leh hmasawnna a kalkawp theihna tur chuan intodelh a tul a; taimak, tawrhchhel leh teirei peih a pawimawh a ni, a ti. Tunlai thiamna leh changkanna hmangin Mizo thalaite pawh khawvel turkverhah englai pawhin kan dakchhuah thei reng tawh a, hetihlai mek hian kan hnam thil te ngaisang a, chawisang tur leh kan hnam tawng te vawnghim turin tan kan lak a tul a; kan ram leh kan hnam hi kan changkan san a thiang lo, Minister chuan a ti a. Mahni hnam changkan san duhna thinlung leh mahni tawng thiam loa changkanna hi changkanna mawng pawp a ni, a ti. Pu Lalchhandama Ralte chuan nationalism, patriotism leh development hi inthlunzawm vek a nih avangin hnam thinlung pu tura kan inzirtir a ngai a, thinlung dik kan pu tur a ni, a ti a. Mizo thalaite zingah ram leh hnam mamawh ngaihtuah hoa, ram leh hnam hmangaihna leh ram hmasawnna ngaihtuah tlang thei tura hun tha buatsaih a ni chu lawmawm a tih thu khuallian chuan a sawi a ni.

India ram-in G-20 Presidency a chelh chhungin India ram hmun hrang hrangah Ministry of Youth Affairs & Sports, Govt of India chuan Youth-20 Programme a buatsaih a. Mizoramah chuan Sports & Youth Services Department leh Mizo Zirlai Pawl (MZP) tangkawpin Mizorama District hrang hrangah Y-20 Meet on Nationalism, Patriotism & Development Programme an buatsaih a ni. Kumin July ni 14 khan Y20 meet hi Mizoram Chief Minister Pu Zoramthanga hovin bultan a ni a, Aizawl Vanapa Hall a programme ropui tak buatsaihah Chief Minister hian a hawng a. Champhai, Mamit, Kolasib, Saitual leh Khawzawl ah te hlawhtling takin he meet hi buatsaih a lo ni tawh bawk a ni.

Y20 meet neih chhung hian ram leh hnam tana hmasawnna tur thil pawimawh tak tak inzirtirna hun neih a ni a, zirlaite thinlunga ram leh hnam hmangaihna tuh turin speaker thlanchhuah ten thu an sawi thin a. Serchhipah hian Pu Lalhruaitluanga Chawngte, Adviser, MZP Gen Hqrts chu speaker a ni a. Mizo nationalism to bul, nihphung dik tak leh a awmzia te sawifiahin, chutiang thinlung pu turin zirlai kalkhawmte a fuih a ni.

Programme hi Serchhip College Principal Pu C Laldintluanga’n a kaihruai a. MZP General Hqrts President Pu Lalnunmawia Pautu chuan keynote address a sawi thung. Vawiin programme ah hian Serchhip khawpui chhunga school leh college zirlai te an tel a. MZP Sub Hqrts Serchhip President Pu Laltlanmawia’n lawmthu sawiin hun hnung a khar a ni.