Champhai Deputy Commissioner Pu H. Lalengmawia chuan vawiin khan Government Champhai College Auditorium-ah zirlaite leh thawktute kawmna hun hmangin, ram tana rawngbawltu rilru pu chunga zirna kalpui turin a chah a ni.

Vawiin hun hi Champhai Govt. College Principal Pu Lalnunmawia'n a kaihruai a. DC Pu H. Lalengmawia chuan zirna kawnga hmasawnna chu ram hmasawnna a nih thu sawiin, zir san ringawt a tawk loh thu leh chhawr tlak thiamna neih a pawimawh thu a sawi a. Tumruhna leh mahni inrin tawkna nena lehkha an zir bakah, nun uluk thiam turin zirlaite chu a chah a ni.

DC chuan zirtirtute mawhphurhna tarlangin, kan ram chhunga quality education siam theite chu kan ram zirtirtute bak an awmlo, a ti a. Zirtirtute chu an hna ah rinawmin, inbuatsaihna tha tak nen an zirtir mai bakah naupangte hnena nun kawng dik kawhhmuhtu nih an tum tur a ni, a ti a. Fate zirna kawngah nu leh pa te an pawimawh ber thu sawiin, fate zirna atana insenso chu 'expenditure' hman ral mai maiah ngai lovin, a let awm leh tur 'investment' a ni tih hriat a tul a nu, a ti.

Zirna in tha leh thalo tehna chu building leh hmunhma tha tak neih a ni mai lova, academic result that ringawt a ni bawk lo a ni, tiin Pu H. Lalengmawia chuan a zirchhuak tawh (alumni)-te dinhmun thlir a teh chu a fuh hle a ni, a ti bawk.

Vawiin hunah hian Addl. DC Pu R. Vanlalsawta, SDO (S) Pu Benjamin Lalzama leh DIPRO Pi Emily Lalrinpuii ten DC hi an tawiawm a ni.