India Danpui hnuaia mitin dikna leh chanvo humhalh tihhlawhtlinna tura khawtlanga mi rethei leh harsa zawk te, a thlawna Dan lama tanpuina hna thawktu Mizoram State Legal Services Authority (MSLSA) hnuaia empanelled lawyer te tana Training, Department of Justice, Ministry of Law & Justice, Government of India-in Legal Cell for Human Rights (LCHR) Guwahati leh Mizoram State Legal Services Authority te nena tangkawpa an huaihawt chu vawiin chawhma dar 10:30 khan Law Minister Pu Lalsawta’n Aijal Club ah a hawng.

Training hawnna thu sawiin Minister chuan rorelna dik chu mitin mamawh a nih reng laiin thubuai nena court-a kal chu thil hautak tak a nih thu a tarlang a. Ram danpui hnuaiah mitin dikna leh chanvo chu humhalh tlat a nih avangin dan hremi kalkhawm te chu mi hnuaihnung leh harsa te tanpuitu, anmahni tana thawk an nih hre reng thin turin a chah a, chhantu leh tanpuitu nei lo te tan thahnemngai taka thawk chhunzawm zel turin a fuih bawk. Mi harsa zawk te dan lama tanpuina hna an thawh thinna ah Mizoram State Legal Services Authority chungah Minister chuan lawmthu a sawi a, an hnathawhna atan Training chu an hlawkpui ngei a beisei thu a tarlang bawk.

Pu Ravi Sagar, Director, Legal Cell for Human Rights, Guwahati chuan Empanelled Lawyers te tana Training chu hmarchhak state zawng zawngah buatsaih a nih thu a tarlang a, Training chu mi hnuaihnung zawk te thuamchakna tur te, ram danpui-in mitin dikna leh chanvo a humhalhna tihhlawhtlinna tur te, Court thuchhuak a nih avanga chung mi hnuaihnung zawk te dinhmun leh harsatna hriatpuia, tha zawka hna an thawh theih nana buatsaih a nih dan te a sawifiah bawk.

Pu D.K.Mahanta, Retired District Judge pawhin rorelna dik kenkawh hna pawimawh tak chu Pathianin an mawhphurhna ah a dah a ni tiin mi chanhai leh hnuaihnung zawk te tanpui hna chu taima taka thawk turin kalkhawm te chu a chah bawk.

Training hian ni 3 a awh dawn a, he hun hmang tur hian Mizoram district hrang hrang atangin empanelled lawyer 50 thlan niin thupui hrang hrang an zirho dawn a ni.