Mipui vantlang lirthei leh kawngpui leh a chhehvela an lo him tlan zawk theihna tura Dan leh Thupek zam a, hma lak dan tur rel in vawiin chawhnu dar 1 khan Pu John Rotluangliana, Transport Minister hovin ama office ah State Road Safety Council Meeting neih a ni. Parliamentary Secretary Pu T.T. Zothansanga leh hemi in a kaihhnawih Department hrang hrang hotu member te an kim hle.

Road Safety chungchangah hma lak chhoh dan tur leh accident kan tawh loh nana lo inven dan tur chungchang pawimawh tak tak Transport Minister chuan sawiin hetiang lama awareness neih a tul dan te a sawi a, Driver tam takin dan an zawm a, an fimkhur em em lai a, dan hre lo lutuk leh mi dangte ngai chang reng reng lo, fiamthu paha motor khalh ching an la awm thin chu chhinchhiah a zirtir an ngaihthu sawiin Minister chuan accident thlen chhan 95 % hi chu Driver te mawhphurhna ah ngaih a nih avangin mipui lo him tlan zawk nan uluk tak leh khauh zawka Dan leh Thupek kenkawh a tul thu a sawi.

Pu Hrangtawna, IRTS Secretary chuan ‘Action on Road Safety Management’ a ruahmanna siam mek chu sawi hawnna neiin Road Safety chungchang hi School Syllabus ah pawh telh tur a niin National Highway leh State Highway hrula Damdawi In leh Health Unit tura ruahman a nih dan te a sawi a. Two Wheeler khalhtu leh a phurh in helmet khum leh car seat hma lama chuang zawng ten seat belt hman tur tih chu Dan dinglai a nih thu sawiin kawngpui a Speed chak lutuk a tlan ven nan ‘Speed Gun’ a tam thei ang ber dah te chu ruahmanna ah a tel a ni.

Mipuite him nan ruahmanna thahnem tak duan lawk chu Committee hian thlir hovin kawngpuia kal dan leh accident laka inven dan kawngah ‘awareness’ neih dan tur chi hrang hrang sawiho a niin Zion Street kawng chho ulh tak siam rem dan tur pawh ruahman a ni.

Pu John Rotluangliana hi vawiin a piancham ni tak a lo nih avangin Transport Department in lawmpuina Birthday Cake zai a niin Committee hian thingpui an in ho nghal a ni.