2249/2022-2023

Champhai, the 8th October, 2022: Champhai District Bawrhsap Pu James Lalrinchhana chuan vawiin chawhnu khan Hmunhmeltha khua a tlawh a, khawtlang hruaitute kawmin hmunhma pawimawh hrang hrangte a tlawh a, khawtlang mamawhte a hlan nghal bawk.

Pu James Lalrinchhana chuan khawtlang mamawh angte a hmuna enfiaha zirchian a pawimawh thu leh khawtlang hruaitute nena sawihoin awmzia thui tak a neih theih thu a sawi a. Khawtlang thatna tur ngaihtuaha inrawnkhawmna hun buatsaih a ni chu lawmawm tiin, khawtlang hruaitute chu rualelna dik nei chunga tan la turte, tun hun mai nilo hmathlir thui tak neia khawtlang mamawh leh tulte ngaihtuah thin turtein a chah a. All India Radio Station Hmunhmeltha chu hriatna leh thiamna kawnga mipuite zirtirna hmanraw pawimawh tak a nih thu sawiin, thawktute theihtawp chhuaha tan la zel turin a fuih bawk.

District Bawrhsap chuan khawtlang hruaitute chu zirna dah pawimawh hmasa ber tura chahin, faina atanga intan hriselna ngaipawimawh turte, ruihhlo laka thalaite fihlim theih nan sports hmanga chona siam tum tur tein a chah a. Nakin lawka ram leh hnam innghahna ni mai tur thalaite khawvel hmabak eng tak siam tura tanho a pawimawh thu a sawi bawk a. Khawtlang inrelbawlna kawnga mi pawimawh tak takte chu khawtlang hamthatna haichhuah leh inrelbawlna tha taka kalpui thei tura dan leh hraite ngaipawimawha zirchiang thin turin a fuih a. Sawrkar thuchhuah leh khapna thupek chhuahte tha taka kengkawha sawrkar hmalaknate thlawp zel turin a chah bawk.

District Bawrhsap hian Hmunhmeltha khua leh a chhehvela hmunhma pawimawh tak tak All India Radio (AIR) Station, Health Sub-Centre, Govt. Hmunhmeltha Middle School, MUP In, MHIP Run, infiamna hmunhma, Hmunhmeltha Park leh Hmunhmeltha-Zote inkalpawhna kawngte a tlawh a. Mamawh leh tul angte khawtlang hruaitu VC member leh NGO hotute a sawipui a, mamawh an thlente tihpuitlin a nih theih nan theihtawp chhuahpui a tum thu a sawi bawk.