2248/2022-2023

Khawzawl, the 8th October, 2022: Vawiin chawhma dar 11:00 khan Khawzawl Zaingen Veng YMA Hall-ah faina hapta 2022 kharna hun hman a ni a. He hun hi District Bawrhsap Pu C.C. Lalchhuangkima chuan khuallian niin a hmanpui a, faina intihsiaka tithate hnenah lawmman a sem a ni.

Khuallian Pu C.C. Lalchhuangkima chuan thu sawiin, faina hian hriselna kawngah nasa takin min pui thei a, tunlai hrileng tam takte hi kan fai tawk loh vanga lo awm thin an ni, a ti a. Kalkhawmte chu faina hapta kaltlangin hriselna kawngah hmasawn tum turin a sawm a. Khawchhung faina intihsiak rahchhuah chungchang sawi langin, Khawzawl tlawhtu mikhualte pawhin an fak hlawh khawpin kan fai a, mikhualte pawhin nuam an ti thin a ni, a ti a. Mualvawm Field leh a chhehvela inkhel entute pawhin faina an ngaipawimawh thar zel a, Mualvawm field awm tirh nena khaikhin chuan inkhel entute pawh an sulhnu a fai tawh hle chu lawmawm a tih thu a sawi bawk.

Rei loteah bawlhhlawh tawih thei leh thei lo thliar hrana a paihna hmun hrang siam tum a nih thu sawiin, chhungkaw tam zawk chuan tawih thei bawlhhlawhte in bul huana Compost Pit-ah an paih thei tawh dawn a, bawlhhlawhte chu awlsam takin lei thaah an chan tir tawh dawn a ni, a ti a. Hetiang kawnga hmalatu PD, DRDA, BDO leh VC-te chungah lawmthu a sawi a. Khuallian chuan faina hapta chu zo mahse faina hapta vang chauha fai lovin, kum tluana fai reng tum turin mipuite a sawm a ni.

Thingtlang (rural) khaw fai inelna result Er. Liantluanga, EE, PHED hnen ațangin ngaihthlak a ni a. Khualen chu pakhatna niin lawmman thuziak cheimawi leh pawisafai Rs. 10,000 (cheng singkhat) an dawng a. Pahnihna dinhmun hauhtu chu Vangtlang leh Rabung te an ni a, thuziak cheimawi leh pawisafai Rs. 5,000 (cheng sangnga) an dawng a. Sialhawk leh Tlangmawi te pathumna an ni a, thuziak cheimawi leh pawisafai Rs. 3000 (cheng sangthum) an dawng a ni.

Khawchhung (Urban) fai inelna result hrang hrangte SDO Sadar Pu James Lalnithanga, DUDO charge la mektu ni bawk hnen atangin ngaihthlak a ni a. Veng fai intihsiaknaah hian lawmman pakhatnain thuziak cheimawi leh pawisafai Rs. 5000 (cheng sangnga), pahnihnain thuziak cheimawi leh pawisafai Rs. 3000 (cheng sangthum) leh pathumnain thuziak cheimawi leh pawisafai Rs. 2000 (cheng sanghnih) a keng tel a. Heng bakah hian inelna category dang zawnga pakhatnain thuziak cheimawi leh pawisafai Rs. 2000 (cheng sang hnih), pahnihnain thuziak cheimawi leh Rs. 1500 (cheng sangkhat zanga) leh pathumnain thuziak cheimawi leh Rs. 1000 (cheng sangkhat) a keng tel thung a ni.

Result kimchang chu hetiang hi a ni:
A) Veng fai inelna:
Pakhatna: Dinthar Veng
Pahnihna: Arro Veng
Pathumna: Kawnzar Veng

B) Office fai inelna:
Pakhatna: DEO & SDEO Office, Vengthar
Pahnihna: DPO, Samagra Siksha, Vengthar
Pathumna: KVK Khawzawl, Kawnzar

C) Zirna In fai inelna:
Pakhatna: Govt. Primary School V, Lungvar
Pahnihna: Govt. Kawnzar Middle School, Kawnzar
Pathumna: Govt. Middle School II, Vengthar

D) Anganwadi fai inelna:
Pakhatna: Centre IV
Pahnihna: Centre V
Pathumna: Centre I

E) Sub Centre fai inelna:
Pakhatna: Darngawn Clinic
Pathumna: Vengthar Clinic
Pathumna: Khawzawl Sub-Centre

F) Bazar fai inelna:
Pakhatna: Chhipchhuan Bazar, Vengthar
Pahnihna: Vengthar Bazar, Vengthar
Pathumna: Taidawnkawn Bazar, Zaingen

G) Hotel/Restaurant fai inelna:
Pakhatna: Tamhnem Restaurant
Pahnihna: CC Restaurant
Pathumna: MS Hotel

Faina hapta kharna inkhawm hi Pu Lalvenhima, Addl. DC in a kaihruai a. Pu Obed Lalmalsawma, SDC chuan lawmthu sawiin hun a khar a ni.