2247/2022-2023

Aizawl 8th October 2022: Mizo Department, Mizoram University leh ACE Rentals and Events ten India Independence kum 75 lawmna nithum awh Programme Evolution Fest a buatsaih kharna Cultural Evening ni 7th October, 2022 zana Mizoram University Multipurpose Hall a neih a khuallian Pu K.Vanlalvena MP (Rajya Sabha) chuan, kan Culture hi kan vawn nun a ngai a, culture vawn nun nachang hre lo hnam an ral thin a ti. Pu K. Vanlalvena MP chuan kan culture hi Mizo min nih tirtu a nih avangin Mizoten kan vawn nun zel a ngai a. Tin, zirna sang University zirlaiten kan culture an buaipui hi kan tih tur dik tak a ni a. Lehkha thiam rualin kan buaipui phawt chuan midang pawhin an zui mai dawn a ni a ti. He huna khuallian Pu K. Vena chuan Mizoram University hi Mizoram Peace Accord vanga lo piang a nih avangin kan hnam hmel lanna pakhat a ni a. Chuvang chuan University tihmasawn zel tura tan la zel turin zirlaite leh thawktute pawh a chah bawk. Tin, a mah ngei pawh NEHU hunlai kum 1996 chho a Mizo Department a lo pian theih nan sulsutu zinga mi a nih ve thu te, Mizo Department-in kum 25 a tling ta chu a lawmpui thu a sawi bawk. 

Khualzahawm Prof. KRS Sambasiva Rao pawhin Mizo Department, Mizoram University ten "Azadi Ka Amrit Mahotsav" hnuaia ni thum chhung awh Evolution Fest, an hmang chu a lawmpui thute, Mizo Department chu Mizoram University hnuaia Department lian ber zinga mi leh hlun ber pawl a nih thute, mithiam tam tak chhe chhuaktu a nih thu te, Mizo tawng google translation a tih changtlun zel te, Mizoram University pawhin culture a ngaih pawimawh avangin University chhungah pawh cultural centre hmun tur pawh ruahman lawk tawh thu a sawi bawk. 

He Evening Culture programme hi zirlai, Mizoram University a thawkte, mi pawimawh sawm bikte bakah Pu H. Wilson, OSD, Union Minister of Parliamentary Affairs leh Nula Jubilee Lalrammawii Parliament Security Service te pawhin an chhim bawk a ni