2246/2022-2023

Kolasib dated 8th October 2022: Vawiin khan Parish Hall, Kolasibah Faina Hapta 2022 kharna hun hman niin Faina hapta kalpui chhunga faina kawnga inelna hrang hrang lawmman sem a ni a. Tumpui Veng chu veng fai ber a thlan niin Superintendent of Police, Kolasib chu pisa fai ber a thlan a ni bawk.

He hun a khuallian Pu K.Lalrinliana, Minister of State, Food, Civil Supplies and Consumer Affairs Department chuan faina tluantling nei tur chuan thawhhona tha neih a pawimawh thu leh in tin atanga fai tur a inzirtirna tha neih a tul thu a sawi a. Solid Waste Management Centre, Kolasib chu faina kawnga hmasawnna thlentu a nih theih nan in tin atanga bawlhhlawh thliar hran ngaih pawimawh a tul thu a sawi. Bawlhhlawh tha tak a thliar hran a nih a sawmgbawl a nih chuan thil tangkai leh hmantlak ah a chantir theih thu Minister chuan sawiin intodelhna kawng ah pawh hmanraw tangkai tak ah hman a nih theih thu a sawi a. Hmun fai leh thianghlim chuan zin mite a hip thin thu te, ram nuam leh nuam lo tehna pawimawh tak a nih avangte in fai chu intihhmuh zel a tul thu a sawi.

Khual zahawm Pu John LT Sanga, Deputy Commissioner chuan faina chuan thianghlimna leh hriselna a ken tel avangin hmasawnna leh changkanna tehfung pawimawh tak a nih thu a sawi a. Fai ngainatna chu mahni theuh atanga intan tur a nih thu te inchhungkhur fai, veng fai leh khawtlang fai siam chu mitin mawhphurhna a nih thu leh fai tur a inluangrual tak a thawhho a pawimawh thu a sawi bawk a ni.

Faina hapta 2022 kalpui chhunga faina kawng a inelna hrang hrang neihna a lawmman sem a ni a. Veng fai ber lawmman chu Tumpui veng in an la a, Office fai ber ah SP Office thlan niin Tumpui Sub-centre chu Hospital & Healthcare facilities fai ber a thlan a ni. Hotel fai ber ah Hruaizel Corner, Diakkawn thlan niin Hmarveng High school chu school fai ber a thlan a ni a, Govt TS Luaia Middel School, Rengtekawn chu Middle school leh a hnuai lam zing a school fai ber lawmman pek an ni bawk.

Faina hapta 2022 kharna hun ah hian Joint Village Council leh All NGO Coordination committee aiawh ten thusawina hun an hmang a, Pu Lalmuan Puia, DUDO in hun kaihruaiin Faina hapta 2022 kalpui chhunga faina kawng a hmalakna hrang hrang tarlanna hun a hmang bawk a ni. Pu Lallawmawma, Addl. DC in lawmthu sawiin sawrkar department leh NGO hrang hrang hruaitute leh school naupangte he hun ah hian an tel a ni.