Champhai Town Sanitation Task Force buatsaihin vawiin chawhnu khan faina kawnga Mizoram khawpui inelna 2018 chu Champhaiah hawn a ni a. He hunah hian Champhai DC Dr. Naveen Aggarwal, IAS chu khuallian niin, Mizoram khawpui fai inelna 2018 chu Champhai District-a kalpui turin a hawng a ni.
Champhai Bawrhsap chuan faina kawnga Mizoram hmasawnna hmuhtheiha a awm chu fakawm a tih thu a sawi a. Mizo mipuite’n neitu thinlung pu chunga mahni In leh a chhehvel mai bakah vantlang hmunhmate thahnemngai taka an tifai thin chu India ram hmun pui zawk pawha an tih ngailoh ani, a ti a. Mizoram fai leh thianghlim siam kawnga khawtlang leh sawrkar thawhhona leh mipuite rilru sukthlek chu a chhuan thu a sawi a. Mizoram fai zawk siam tura Khawpui fai inelnaah Champhai District chhunga khawpuite theihtawp chhuah tura sawmin khawpui fai inelna a hawng a ni.
Khawpui fai inelna chungchang sawizauna leh hrilhfiahna Pu K.Lalhmuakliana, District Urban Development Officer Champhai chuan a nei a. Nikum inelna atanga insiamthatna tur leh hmasawnna tur awmte pawh sawilangin, kumin hmachhawpte a sawi bawk a ni.
Hawnna hun I&PR Auditorium CHANEM Building, Champhai a neih hi Pu Abraham Beirazi Khithie, SDO (Sadar) Champhai chuan kaihruaiin kalkhawmte lawmna thu a sawi a. Fai kawnga inzirtirna Banner Champhai Town chhunga VC tinte hnenah Bawrhsapin a sem a. Inrawnkhawmna hun neih chhunzawm niin, VC hrang hrangte zawhna leh harsatna thlente UD&PA hotute’n an chhan sak a ni. He hun hi Pu Abraham Beirazi Khithie chuan lawmthu sawina neiin a khar a ni. Hawnna programme neih zawh hnu hian Dr. Naveen Aggarwal chuan Community Bin semna CHANEM Building tualzawlah a nei nghal a ni.
Khawpui fai inelna hi nikum lamah pawh Category hnih; District Capital bikte inelna Category I tih leh khawpui dang zawngte awmna Category II huanga neih a ni a. Category I hnuaiah Champhai awmin, Category II hnuaiah Khawzawl, Khawhai leh Biate-te an awm ve thung a ni. Champhai khawpui chu Category I huanga inelnaah Mizoramah pathumna niin, Category II ah Biate hi pakhatna anih bakah a pum puia khaikhawmin Mizoramah pakhatna a ni bawk a ni. Kuminah pawh Champhai District chhunga khawpui pali Champhai, Khawzawl, Khawhai leh Biate-te chu he inelna huanga tel tur an ni a. Hmalakna tur chhawpchhuah hrang hrang; Sanitation Committee din, Hnatlang, Bawlhhlawh bawm tam thei ang ber dah, Hoarding siam, Banner tar, awm ze nei taka bawlhhlawh paih, Lui kawr mumal tak neih leh tihfai, mipuite hnena a tam thei ang ber zirtirna ziak leh hriat tura puanchhuahna neih leh tul dangahte tanlak zual tum a ni.
