Vawiin chawhnu khan Rs. 90.69 lakhs senga sak Haulawng Primary Health Centre Building thar chu Health and Family Welfare Minister Pu Lal Thanzara’n a hawng. He hunah hian Social Welfare Minister leh bialtu MLA ni bawk Pu PC Lalthanliana chua khualzahawm a ni.

Health Minister Pu Lal Thanzara chuan Haulawng Primary Health Centre Building thar chu Haulawng leh Lunglei District mipuite tan hmasawnna mellung pawimawh tak a nih a beisei thu sawiin Department hnathawktute leh khawtlang mipuiten thawhhona tha tak nena thahnemngai taka hma an lak avangin an chungah lawmthu a sawi a. Haulawng PHC chu Mizorama PHC changtlung pawl tak a ni a, hun reiloteah Health and Wellness Centre a hlankai tum a ni tiin facilities changtlung zawk leh hmanrua dah belh a nih dawn bakah Counseling Center te siam a nih tur thu a sawi a.  Health and Family Welfare Department hnuaia hmalakna hrang hrang – Specialist doctor panga (5) leh Medical Officer sawmthum leh pakhat (31) lak thuai an nih tur thu te, Nurse 70 regularise an nih tur thu te, District hospitals leh health centres-te hmanraw changkang zawka thuam that leh tihchangtlun an nih thu te, National Health Programme hrang hrang ngawrh taka kalpui zel an nih thu te a tarlang a. Mizorama MBBS zirna in hmasa ber Mizoram Institute of Medical Education & Research (MIMER), Falkawn chu  Mizoram tan hlawhtlinna ropui tak a nih thu leh, hriselna kawnga hmasawnna nasa tak a nih thu a sawi bawk. Hriselna leh zirna hi ram thang mek te tan hmasawnna tehfung pawimawh ber an ni tiin Health Minister chuan hriselna kawngah Mizote nasa takin hmasawnna tur kan nei a, dam duh chuan kan nunphung (lifestyle) kan uluk a tul a ni, a ti a. Mahni hriselna theuh ngaipawimawh a, ruihtheih thil laka fihlim piah lamah vaihlo zuk leh hmuam a filhlim te, mahni tlin tawk a ei leh in uluk leh nunphung tha neih tlan a pawimawh thu a sawi a ni.

He huna khualzahawm Social Welfare Minister Pu PC Lalthanliana chuan Health and Family Welfare Minister chak tak hmalakna zarah Haulawng leh a chhehvel khua ten PHC changtlung tak an nei thei chu lawmawm a tih thu a sawi a. Sawrkar hmalaknain Mizoram hmun hrang hrangah Nursing School hawn niin tun dinhmunah Mizo nula leh tlangval tam takin khawvel hmun hrang hrangah nursing hna thawkin an hlawhtlin pui hle a ni, a ti a. Haulawng PHC-a hnathawktute hnenah fuihna thu sawiin bialtu MLA chuan an tawngkam leh chetzia ah te fimkhur a, damlote thlamuantu ni turin a chah a. Sawrkarin mipuite hmakhaw ngaia hmasawnna ruhrel a siam te chu duat tak leh neitu rilru pu chunga enkawl turin kalkhawmte a ngen a ni.

Vawiin hawnna inkhawm hi Dr. F. Lallianhlira, Principal director, Health and Family Welfare Department-in a kaihruai a, Er Pazawna, EE PWD Building Division chuan Technical Report pein Dr Thani Pachuau, CMO Lunglei chuan lawmthu sawiin hun a khar. Hawnna inkhawm ah hian Health & Family Welfare Department leh Department dang hotute bakah tlawmngai pawl hrang hrang aiawhte, khawtlang hruaitute leh Haulawng mipui thahnem tak an kalkhawm a ni.

Haulawng PHC New Building hi 21/03/2016 ah khan sak tan niin 17/02/2017 ah sak zawh a ni a. Civil Works ah Rs. 90,69,960 sen niin Internal Electrification ah Rs. 10,00,000/- sen a ni a. A building zau zawng area hi 386.98 Sq Metres a ni. He PHC ah hian khum paruk (Male -3 leh Female - 3) awmin Nurse Station, Labour cum Delivery Room, Minor OT, Sterilization, Laboratory, Medical Officer Room, Ayush Officer Room, Pharmacy, Nurse changing room, casualty leh store room bakah inthiarna toilet pariat (8) a awm a ni. Haulawng PHC hnuaiah hian Sub Center 4 awmin khaw 11 a bial a ni.