2853/2023-2024

Champhai the 27^th November, 2023 - Ruantlang Games & Sports Association buatsaihin naupang leh thalaite tana intihhlimna leh sports discipline hrang hrang hnuaia intihsiakna 'Ruankhawpui Sports Meet' chu vawiin atang khan neih tan a ni a. Champhai DC & Chairman, District Sports Committee Pu James Lalrinchhana chuan tukin zing dar 6:30 ah khan Ruantlang Dawrkawn ah a hawng a ni.

Hawnna inkhawm Pu Zodingliana, President Ruantlang Games & Sports Association kaihhruaiah Pu James Lalrinchhana chuan thu sawiin, thalaite hmakhua ngaia an tana program hlu tak buatsaih saktu Ruantlang Games & Sports Association te chungah lawmthu sawiin, naupang leh thalai kalkhawmte chu ruihhlo laka fihlim tlat tur leh an zirna te ngai pawimawha taima leh tumruh taka zir thin turin a chah a. 'Ruankhawpui Sports Meet' chuan thalaite rilru leh taksa hriselna kawngah te leh khawtlang mipuite inlungrualna kawngah te nghawng tha tak a neih ngei a beisei thu sawiin kalkhawmte chu hun hlimawm leh hlawkthlak tak hmang theuh turin duhsakna a hlan a ni.

Pu C. Thangchuanga, Asst Commissioner, Excise & Narcotics Department chuan he hunah hian Ruihhlo Do Campaign hun a hmang a, Pi C. Lalremruati, DIPRO Champhai chuan Champhai District Ruihhlo Do Committee aiawhin Ruantlang Games & Sports Association hnehah cheng sing khat sang nga (Rs.15,000/-) a hlan a ni.

'Ruankhawpui Sports Meet' hi tun kar chhung hman tur niin, sports discipline 10 hnuaiah intihsiakna neih a ni dawn a ni.