2854/2023-2024

Hnahthial the 27th November 2023: Hnahthial District a 29-South Tuipui (ST) A/C ah vote chhiar tura inbuatsaihna chu urhsun taka kalpui mek niin vawiin khan ECl thuchhuak angin Counting Dress Rehearsal neih a ni a, hemi rual hian vote chhiar tura ruat Counting Supervisor, Counting Assistant leh Micro observer-te tan training buatsaih nghal a ni a,District Election Officer Pu Chuauhnuna, Returning Officer Pu Lalvenhima te bakah Election Officer, ARO te leh official dang ten an hmanpui a ni.

Vawiin Training, DC Conference hall, Rallangtlang-a neihah hian DEO Pu Chuauhnuna chuan thuhma sawiin training tura kal te chu chibai a buk a, vote chhiar chu huphurhawm a nih loh thu a sawi rualin official ruat te chu an mawhphurhna theuh tha taka hlen turin a chah a ni. 29-South Tuipui AC Returning Officer Pu Lalvenhima pawhin thu sawiin Hnahthial District anga vote chhiar vawikhatna tur a nih avangin a phurawm hle a ti a, December ni 2 ah counting officials te 2nd randomization neih a nih dawn thu tarlangin vote chhiar ni tur December ni 3 zing Dar 5:00 ah vote chhiar tur te thutna tur ruahmanna 3rd randomization neih a nih dawn thu a tarlang bawk.

Vawiin inhrilhhriatna hi State Level Master Trainer, Pu Neng Thianlala, ARO leh SDO (S) ni bawk chuan a nei a. Counting agent ruat chungchang leh vote chhiar ni a hriat tur tul leh pawimawh te inhrilhhriatna hun hman niin EVM vote chhiar dan, Postal Ballot leh Electronically Transmitted Postal Ballot Paper (ETPBS) chhiar dan te inhrilhfiahna a nei a ni. Counting Supervisor, Counting Assistant leh Micro Observer te mawhphurhna tarlangin vote chhiar ni a harsatna hrang hrang awm thei te leh chinfel dan tur te a tarlang bawk a ni. 29-South Tuipui AC a vote tla te hi DC Conference Hall, Rallangtlang a chhiar tura ruahman niin vote chhiarna tur table 9 bakah RO table, Observer table leh ETPBS table te hun a ni dawn a, counting table tinah mi 3- Counting Supervisor, Counting Assistant leh Micro observer te thu tura ruahman a ni a, Observer table-ah Micro Observer 2 leh Counting Assistant 1 an awm dawn bakah RO table ah ARO, Supervisor, Assistant leh Micro Observer 1 theuh an thu dawn bawk a ni. ETPBS table ah Supervisor bakah Counting Assistant leh DEO an thu dawn bawk a ni. Vote chhiar hi round 3 a zawh hman tura ruahman a ni a, December ni 3 zing Dar 8 atangin vote hi chhiar tan a ni dawn a ni.