Sorkar laipui (Ministry of Home Affairs) in thuchhuah a siam hmanga Mizoram sorkar-in Silai Licence awmsa te a buthar a thlak vek tura a tih angin Champhai District chhunga Silai Licence neite hnenah a thar a siam sak mek a ni a. Champhai DC Pu Vanlalngaihsaka chuan vawiin khan DC Conference Hall-ah Silai Licence bu thar a tlangzarh bakah Silai Licence bu thar siamte hnenah a sem chhuak.
He hunah hian SDC Pu Remlalliana Hnamte chuan Air Gun Licence chungchang a mipui hriat tur tarlanna nei zui nghalin, Sorkar-in thu chhuah a siamah : 1. Air Gun neitu zawng zawng-ten August 4, 2017 ralhma ngeiin anmahni bialtu VC/BDO emawh DC Office-ah in hriattir vek tur a ni. 2. Air Gun .22 Calibre chunglamte chu Silai puitling a pawm a niin, Arm Licence pangngai pek vek tawh tur a ni. 3. Air Gun .177 Calibre, 20 Joules aia kapna chinte pawh silai puitling a pawm anih tawh dawn avangin, Licence pek vek tawh tur a ni. 4. Air Gun .177 Calibre, 20 Joules aia kapna lo chin pawh Arm Licence Not Required Certificate pek an ni thung ang. 5. Air Gun Registration leh Licence siam dan tur kimchang chu in-hriattir leh anih dawn thu a sawi.
Sorkar-in Arms Rules 2016 tlawhchhan a thuchhuah a siam anga, mi pakhat tan Silai pathum neih phal sak anih angin, heng Silaite hi Licence buthar-ah a vai a ziakluh vek a ni tawh dawn a. Silai Licence nei zawng zawngten an Licence leh Passport Size thlalak fiah tak pakhat (copy khat) kengin kumin August 31 thleng thlak theih hun hawn a ni a. Silai Licence bu thar siamna man hi Rs 100/- niin, hun tiam chhunga tifel lo ten harsatna an tawk anih pawhin Champhai District thuneituten mawh an phurh loh tur thu he hunah hian tarlan a ni bawk.
