Nimin (29.5.2015) khan Champhai DC Pu H. Lalengmawia chuan Vapar leh Murlen khua tlawhin, Vapar a English Medium School Building thar a hawn bakah DC hian Murlen khawtlang hruaitute a kawm nghal. Vapar English Medium School building hawn hi Office building thar feet 18 x 15 a zau niin BADP sum cheng Nuai 7 a sak a ni a, he school-ah hian (Nursery atanga Class VIII) zirlai 100 kal mekin, zirtirtu 7 an thawk mek bawk.
DC Pu H. Lalengmawia chuan Champhai District chhungah zirna tih hmasawn anih theih nan theih tawp a chhuah thu tarlangin, khawchhak tlangdung atanga lehkhathiam tam tak awmna thinah zirna tlahniam ta ni a lang chu a vei thu a sawi a. Zirlaite thiamna dik tak pe turin School building tha mai piah lamah zitirna petu (Zirtirtute) an pawimawh thu a sawi a. Zirlaiten thiamna an dawn bakah nun kawng dik an zawh theih nan zirtirtu-in zirlaibu piahlam zirtirna pek atul thu leh zirtirtute chu naupangte tana entawn tlak a nitin nun an hman uluk atul thu DC chuan sawiin, zirlai naupang kaihhruaina kawngah nu leh pate pawhin mawhphurhna sang tak an chang a ni a ti.
Champhai DC chuan India ramah zirna in Maktaduai khat leh a chanve a awm mek a, zirna in tihtam aiin zirna tha pechhuak thei zirna In a pawimawh thu leh zirlai naupangte dinchhuahna tura sum senso hi sum khawhralna ni lovin fanau rochante thuamthatna anih zawk thu a sawi a. Champhai District chhungah hmeichhia leh naupang chunga hleilenna thleng thin chu a ngaimawh thu sawiin, dan leh thu pek kengkawhtute thawh chak vanga hluar ta a lang nge a nih, hleilenna hi a thleng tam hrim hrim zawk tih hriat thiam a har thu leh heng hleilenna thleng zingah zirtirtute an bang bik lo chuan a rilru a kap thu leh pawi atih thu Pu H. Lalengmawia chuan a sawi bawk.
Champhai District a khaw 80 chuang awmah khawtinte dinhmun leh sukthlek chiang zawka a hriat theih nan DC Pu H. Lalengmawia chuan khaw 35 tlawh chhuak tawhin, khaw chengker leh kilkhawr zual deuhte tlawh hmasakah a nei mek a. Hun reilote chhungin Champhai District khawtinte tlawhchhuah vek tumin DC chuan ruahmanna a siam mek a ni.
Vapar leh Murlen khua a tlawhna ah hian DC hi Champhai District SSA Deputy DPC Pu H. Lalhminghlua leh Champhai SDPO Pu Lalringliana Pachuau leh midang ten an tawiawm a ni.
