Nimin khan Champhai Bawrhsap Pu Vanlalngaihsaka chuan Champhai panna kawng Tuivawl lei chhaka leimin avanga harsatna thleng thin chu a hmunah kalin a enfiah.
Tuivawl lei chhaka kawng chhak min in khualzin te tan harsatna tamtak a thlen thin avangin PWD hmalakna in chhawrdawh (benching) chhawng 3 ah siam a ni a. He chhawrdawh hian lei min belh thei ina kawng a hnawh ping tur chu a veng thei dawn niin PWD hotute chuan an sawi a. Lei minna hmunah hian Champhai atangin DC Pu Vanlalngaihsaka bakah Addl DC Pu CC Lalchhuangkima, PWD EE Pu Vanlaldika leh Champhai NGO Co-Ordination Committee hruaitute an kala, Aizawl atangin Pu Lalruata Sailo SE National Highway Circle-2 , Pu JH Rimawia Aizawl Addl DC, Pu R.Vanlalsawma Saitual SDO(c) te bakah Power & Electric Department atangin Official te an tel bawka, chak taka hmalak zui dan tur ngaihtuahin a hmunah ro an rel nghal a ni. Lei minna chhak ah hian Transmission Tower tlu mai thei dinhmuna ding chu sawn chhuah a electric hrui kal dan tih danglam tum a ni a.
Champhai atanga Aizawl pan tur leh Aizawl lam atanga Champhai pan tur te tan lei minna hmuna motor in sul pel dan tur chu a hnuaia mi ang hian hunbi siamin, hei hi khualzin leh lirthei khalh tuten zawm hram turin an ngen a, zawm lo chu an chungah action lak a nih tur thu an titlu nghal bawk.
Champhai to Aizawl 11:00 Am- 12:00 noon leh 4:00 Pm to 5:00 pm
Aizawl to Champhai 12:00 noon to 1:00 Pm leh 5:00 pm to 6:00 pm
Zan 10:00 pm to 6:00 Am chu free hours a puan a ni.
Pu Lalruata Sailo SE National Highway Circle-2 ina a sawi dan chuan Seling- Champhai inkar hi kum 2014 khan National Highway-6 a puan ni tawh mahse, kumin 2017 April ni 1 khan Mizoram PWD kuta hlan a ni chauh a. MPWD kuta hlan a nih hma 2014-2017 chhung hian Border Roads Organization (BRO) lamin kawng hi an enkawl tawh loa MPWD kuta a awm bawk si loh avangin kawng enkawl chungchangah harsatna a awma. April ni 1 ,2017 a MPWD kuta hlan a nih hnu in theihtawp an chhuah thu a tarlang a , Seling atangin tuirini thleng resurfacing zawh tawh niin, keifang leh kawlkulh inkar pawh tan tawh niin, kawlkulh atanga khawzawl leh khawzawl leh champhai inkar pawh Estimate siam mek niin chak taka hmalak an tum thu MPWD hotute chuan an sawi a ni.
