Nimin khan Lawngtlai BDO BNRGSK Hall-ah SIRD&PR Extension Training Centre, Pukpui buatsaihin Lawngtlai RD Block chhunga village council thlan bikte tan thingtlang khuaa hmasawnna kalpui dan tur leh ruahmanna chungchang zir hona "Training on Gram Panchayat Development Plan (GPDP)" buatsaih a ni a. Lawngtlai BDO Pu Zoramsiama Hmar chuan he training hi hmanpuiin a hawng.

Pu Zoramsiama Hmar chuan training ngai pawimawha khawtlang hruaitu kal khawmte chungah lawm thu sawiin, ram leh khawtlang hmasawnna atan an thil zir te chu hlawkpuia chhawr tangkai ngei tum turin a chah a. Sawrkarin ram leh khawtlang hmasawnna tur ruahmanna hrang hrang a siamah VC-te'n mawhphurhna sang tak an nei tiin, khawtlang hmasawnna tura ruahmanna lo kal chu kan tu leh fate tan a ni a, VC te'n dik tak leh tangkai taka kan hman thiam a pawimawh a ni, a ti.

He training-ah hian Pu R. Lalhmingmawia, Faculty (NRM) chuan khawtlang leh ram hmasawnna atana village council-te mawhphurhna chungchang 'roles and responsibilities of village council' tih hmangin zirtirna a pe a. Chawhnu lamah Lalchungnungi Chawnghlut, MRP chuan Gram Sabha chungchang a zirtir a. Faculty (DPRC) Pu Vanlalhruaia Ralte-in khai khawmna hun a hman hnuah, sawi hona hun hman chhunzawm a ni.

He training hi ni thum awh tur niin, Lawngtlai RD Block chhunga village council thlan bik atangin mi 15 vel an tel thei a ni.