Vawiin khan Champhai Bawrhsap Pu Vanlalngaihsaka chuan Champhai Dinthar venga Kendriya Vidyalaya sak mek chu a hmunah kalin a enfiah.

Champhai KV hi Central PWD sak niin July 2016 a sak tan a ni a March 2018 a sak zawh hman tura ruahman a ni. He sikul sak zawh nan hian Central sum Nuai 2723 (27.23 Crore) ruahman niin, nuai 620 hmuh tawh a ni a, hna za a 30 (30%) thawh zawh tawh a ni. Sikul Compound panna kawng km 1.8 vela thui chhezual chu a siamthat dan tur leh Sikul Compound hungna tura ram buai awm te pawh enfiah nghal a ni a. Hemi bakah hian KV a naupang zirlai an pun theih dan tur (enrollment) te ngaituah pui turin KV hotute chuan DC chu an ngen a, Right to Education (RTE) hnuaia Pawl 1 atanga pawl 12 thleng a thlawna lehkha a zir theih thu leh zirlai bu leh uniform pawh an tum sak theih thu te an sawi a, kumin a tan Admission chu August 31 thleng hawn a nih thu an tarlang bawk a ni. Champhai Bawrhsap Pu Vanlalngaihsaka chuan a theihna zawna tanpui a inhuam reng thu KV hotute chu a hrilh a, harsatna hrang hrang an tawh mek te chu sutkian dan tur ngaituahin hma alak pui tur thu a sawi bawk a ni.

Champhai Bawrhsap hi Pu CC Lalchhuangkima Addl. DC, Pu Lalnunmawia Principle Govt. Champhai College, Pu K. Vanlalhmuaka, District Urban Development Officer, Pu Remlalliana Hnamte, Assistant Settlement Officer leh PWD SDO  ten an tawiawm a ni.