Vawiin khan Ministry of Tribal Affairs bultuma sak Govt KVM HS, Chhinga Veng-a Scheduled Tribe Girls’ Hostel chu Finance Minister Pu Lalsawta chuan a hawng a; he hunah hian Social Welfare Minister Pu PC Lalthanliana chu Khualzahawm a ni bawk. 

ST Girls’ Hostel hawnna inkhawm SWD Director Dr.Lalnunthara kaihhruaiah Khuallian Pu Lalsawta chuan state sorkarin sum a harsat laia sorkar laipui ruahmanna tha tak Social Welfare Department kaltlanga chhungkaw harsa zawk leh awmna tur nei lo hmeichhe zirlaite tan hostel sak a ni thei chu a lawmawm hle a, ama MLA Bial ngeiah hostel changtlung tak an nei ta hi a vanneihthlak hle a ni a ti. He hostel hi zirlaite bakah vengchhung mipuite tan pawha chhawrnahawm tak a nih a beisei thu sawiin a vawn fai leh hosteller hmeichhe zirlaite himna thlengin sikul hotute bakah vengchhung mipuite mawhphurhna a ni tel a ni a ti bawk. Pu Lalsawta chuan tunlai mithiam ten hmasawnna awm reng reng lohna ramte chu ‘under-developed’ ni lovin ‘under-managed’ an ni zawk a, a chhan chu hmasawnna kal muanna chhan ber chu heng ram inrelbawlna leh kalphungah themthiamna, taimakna leh remhriatna a tel loh zawk vang a ni tih a tarlang a. Mizoramah pawh harsatna hrang hrang karah remhre zawk leh mithiamte hmalakna zarah hmasawnna rah engemawzat ram mipuiten an  hmu mek a ni, a ti. 

Khualzahawm Pu PC Lalthanliana pawhin thu sawiin Ministry of Tribal Affairs chuan Social Welfare Department hnuaiah ST Girls’ Hostel 13 sakna senso a tum vek a, hostel 10 sak zawhfel tawh niin vawiina hostel hawn tak hi a 9-na a ni a, hostel 3 dangte chu sak zawh thuai a ni ang a ti. Heng bakah hian Social Welfare Dept leh Northeast Consultancy Services (NECS) tangkawpin project engemawzat an thawk mek a; Mizoramah hmun 4 - Ngopa, Tuipang, Chawngte leh Lawngtlai - ah Residential School sak mek a nih thu leh Girls Hostel thar sak nan cheng nuai 40 pawh pek an nih thu a tarlang a. Pu PC Lalthanliana chuan sorkarin zirna hmasawn nan theihtawp a chhuah zel a, amaherawhchu zirna tha leh tha lo chu building tha leh tha lo a innghat a ni lova, zirtirtute leh zirlaiten thahnemngaihna leh tihtakzetna an neih a ngai zawk a ni, a ti bawk. 

Vawiin Hostel hawnna inkhawmah hian he project thawktu Northeast Consultancy Services (NECS) Director Pu Robert Romawia Royte Technical Report tarlan danin ST Girls Hostel, Chhinga Veng hi cheng nuai 337.54 senga sak zawh a ni a. He hostel hi building 2 (Block A & Block B)-ah then niin chhawng 3 a awm ve ve a; hostel rooms bakah study hall, recreational hall gallery, kitchen, dining hall leh toilet block 7 a awm bawk a. Social Welfare Department kaltlangin Scheduled Tribe Girls’ Hostel 10 hawn tawhna hmunte chu :

1. KM High School

2. Saitual High School

3. KVI, Zemabawk

4. ST Girls Hostel, Durtlang

5. Thenzawl High School

6. HATIM, Lunglei

7. Serkawn Sikulpui

8. Mualpui ST Girls Hostel

9. KVM High Scool, Chhinga Veng