Champhai Distict Deputy Commissioner thar Pu H.Lalengmawia, IAS chuan vawiin khan DC Conference Hall-ah Champhaia tlawmngai pawl leh Kohhran hruaitute a kawm.
Champhai DC thar Pu H.Lalengmawia chuan, he hun hi inhmelhriatna bakah District hmasawnna tura ke penna kawnga ngaimawh zawng leh hmathlir inhrilhtawnna hun atana buatsaih a nih thu a sawi a. Champhai District-a hmalakna tur zingah zirna chu a ngai pawimawh ber a nih tur thu tarlangin, India-in ram changkang nih a tum meknaah Quality Education-hi hmanruaah hman a tum a, Champhai District-ah pawh quality education kan neih theih hi thil duhawm ber a ni, a ti.
Champhai bawrhsap thar chuan ziak leh chhiar thiam tihpun te, tuihna humhalh tura mau phun uar te, Zokhawthar border trade a nih dan tur ang a nih hmaa Mizoram sorkarin tun aia hlawk zawka a chhawr theih dan tur ngaihtuah te, infiamna lama thalaite hmasawnna ngaihtuah thar te leh faina lama hmasawn te chu a hmathlir a nih thu sawiin hetiang tipuitling tur hian kalkhawmte chu thawhhopuiah a sawm a ni.
He meeting-ah hian Champhai Sub-Hqrs YMA, Champhai MHIP Sub-Hqrs, NGO Coordination Committee aiawhte bakah Champhai Joint VCP President leh Kohhran hruaitute an tel a ni.
Pu H.Lalengmawia hian vawiin chawhnu khan DC kalchhuak ta Pu Sangdingliana hnen atangin DC nihna hi la fel a. Pu Sangdingliana hi Industries Deptt-ah Special Secy in a awm dawn a, Pu H.Lalengmawia hi School Education Deptt Director atanga rawn chho a ni thung.
