Vawiin khan Lunglei District DCC/DLRC/DLSC chu an Chairman Lunglei DC Pu Ashish Madhaorao More, IAS hovin ama office chamber-ah an thukhawm a, Lunglei District huamchhunga Bank hrang hrangte hmalakna leh mipuite tana an hnathawh an thlirho a. He meeting-ah hian RBI, Guwahati atangin Pu Saibal Chakraborty pawh a lo tel a ni.

Meeting-ah hian kum 2014-2015 chhunga Lunglei District Bank hrang hrangte tana Annual Credit Plan (ACP) chu Lunglei DC hian a tlangzarh nghal a, PMJDY hnuaia chhungkaw tinah Bank Account pakhat tal hawn tura sorkar laipuiin a duan chu ngai pawimawh zual turin Bank aiawhte a chah a ni. Chief Manager, Lead bank Office, Lunglei Pu James LH Pachuahu chuan thuhma sawiin nikum October thlaa meeting minute-te a chhiarchhuak a, bank hrang hrangte ‘target’ tur bituk theuh an bawhzui leh hmalak tawh chin a tarlang.

Bank-ten CD Ratio, Agriculture Loan, Annual Credit Plan, Kissan Credit Card, Self-Help Group Credit & Linkage, JLG Target, SJSRY & PMEGP, Housing Loan, Education Loan, PMJDY chungchanga an hmalakna neih tawhte thlirho a ni a. Lunglei District huamchhungah nikum khan mipuite Bank kalhmang leh scheme hrang hrang chungchang inzirtirna hun ‘Financial Literacy Campaign’ vawi 2 neih tawh a ni a, karleh ni 16.2.2015 (Thahwtanni) khian Zobawk-ah neih a ni leh dawn bawk. Bank tinte chu security guard nei a, CCTV leh Alarm System vuah vek tur an ni a, Security logbook nei vek tura hrilh an ni bawk. Bank aiawhten loan rulh lamah mipui an inthlahdah thu sawiin tunah hian loan rulh tha lo case 132 (cheng nuai 282.94) awm mek a, hei hian loan puk duhte tan pawhin harsatna a siam thin tih an sawi.

Vawiina DCC/DLRC/DLSC meeting-ah hian State Bank of India, Canara Bank, IDBI, Mizoram Rural Bank, Mizoram Cooperative Apex Bank, Axis Bank, Syndicate Bank leh sorkara Line Department hrang hrang aiawhte an tel a ni.