No.1785/2020-2021

Dated Champhai the 8th June, 2020 (Monday): Champhai District Bawrhsap thar tura ruat Pi Maria C.T Zuali, MCS chuan vawiin chawhma khan Champhai District Bawrhsap mawhphurhna chu Pu Mark Lalthanliana, MCS hnen atangin a la fel a. Pu Mark Lalthanliana hian Addl DC hna a chelh chhunzawm dawn a ni.

Charge inhlanna hun Champhai DC Pisa-a neih zawhah hian Deputy Commissioner thar hian Officer leh thawktute a kawm nghal a. Sawrkar hnathawkte chu thil thar leh tha zawkte ngaihvena hmasawn tura insiamrem hreh lo turin a fuih a. Mahni hma zawn theuha tihtur leh mawhphurhna awmte theihtawp chhuaha hlen tum tura chahin, sawrkar hna thawh chu kan eizawnna mai piah lamah kan mawhphurhna a ni tih kan hriat reng angai a ni, a ti. Sawrkar Pisa-a thawktu a te ber atanga lian ber thlenga tanrual a tul thu sawiin, Champhai district chu district mawi, sik leh sa nuam tak, pipu sulhnu tamna leh a mi chengte pawh zonun zemawi chawinun tum tlattute nia a hriat thu a sawi bawk.

Bawrhsap chuan he hunah hian Officer leh Staff-te chu Office inkaihhruaina leh hmachhawpte a sawipui a. Addl DC Pu Mark Lalthanliana leh SDO Sadar Pu Lalnunfela Chawngthu te pawhin thu pawimawh leh fuihna thu an sawi bawk a ni. Vawiin chawhma vek khan Champhai SP Pu Rex Zarzoliana leh a thawhpui Officer-te chuan Bawrhsap thar hi kawmin duhsakna an hlan a ni.

Pi Maria C.T Zuali hi Mizoram Sawrkar Home department-a I.G Prisons hna chelh mek Champhai DC tura sawn tak a ni a. Kum 1998 a MCS hna zawm a ni.