2305/2023-2024

Champhai the 13^th October, 2023 – Vawiin khan Champhai DC & DEO leh 24-Champhai South AC Returning Officer ni bawk Pu James Lalrinchhana, hovin election kaihhnawih pawimawh hrang hrang sawihona hun Press Meet neih a ni.

He hunah hian 25-East Tuipui AC Returning Officer Pu Lalrinawma, Addl SP Pu Lalmalsawma Hnamte, Election Officer Pu Benjamin Zalawma Ralte leh election officials dangte telin, Champhai District MJA member-te an kal tha hle a ni.

Champhai DC & DEO Pu James Lalrinchhana chuan election hmachhawn turin Champhai District inpuahchahna chak taka a kal mek thu sawiin, a mawphurtu officials te thawhrimna leh inpekna avangin ruahmanna felfai tak a awm thu a sawi a. Champhai District ah media thawktu taima leh an hnaa inpe tak tak an awm chu lawmawm tiin, election kaihhnawih news te thahnemngai taka lo puang chhunzawm zel tur leh Vote thlak pawimawhna mipuite lo zirtir turin a sawm a ni.

Champhai District a thawk tur Polling Officials-te training hmasa ber chu October ni 17 leh ni 18 ah te neih a ni dawn a. Inthlannaa hman tur EVM leh VVPAT-te pawh ruahman fel tawh niin, ECI in a rawn tirh Engineer ten First Level Checking (FLC) nei zo tawhin a thalo hmuhchhuah te pawh thawn let an ni tawh a. District-ah inthlanna ralmuang leh hlawhtling tak neih anih theihnan Enforcement agency hrang hrangten ngawrh taka District hhung vilin, inkalpawhna kawng, inbiakpawhna mobile leh internet signal leh Banking chungchanga hmalak tul te pawh bawhzui nghal a ni a. Champhai District-a Polling Station 84 ah te ECI in a bituk angin Voter te tana facility hrang hrang awm tur – Assured Minimum Facility-te pawh ruahman fel chhoh niin, pianphunga rualbanlote tan ramp-te siam mek a ni a. Assembly Constituency tinah Hmeichhe hlang duty na ‘Dingdi – Pink Polling Station’ pathum theuh siam a ni dawn a. Election ah hian hman khat daih plastic a tlem thei ang ber hman tum a ni a. Election Expenditure Monitoring hnuaia team hrang hrang – Flying Squad, Video Surveillance Team, Static Surveillance team te chu duty chhuak tawh in, uluk takin Model Code of Conduct leh expenditure te an enfiah a. Khua leh tui vote nei thei chin ten Vote an thlak ngei theihnan SVEEP hnuaiah Awareness program-te ngawrh taka kalpui chhoh a ni bawk.

Election hun chhunga media mi te hman tur an mamawh hrang hrang chhawpchhuahna Media Centre chu DC Office chhungah hian ruahman fel a ni tawh a. Press Meet neih zawh anih hnu hian Media Centre leh Assembly Constituency hrang hranga atan EVM Strong Room leh Vote chhiarna tura ruahman te an tlawh nghal a ni.

Champhai District tana Expenditure Observer Pu Abhishek J Jain chuan Mizoram panin tukin khan Delhi a chhuahsan a. Expenditure kaihhnawiha hmalakna te leh ruahmanna te a rawn enfiah dawn a ni.