2304/2023-2024

2023 Khuangchawi thla ni 13: Vawiin khan Kolasib District Bawrhsap Pu John LT Sanga ruahmannain Mizoram district pahnih - Kolasib leh Mamit te, Assam district pathum - Cachar, Hailakandi leh Karimganj te, leh Tripura State-a North Tripura District-a Deputy Commissioner leh Superintendent of Police ṭheuhte chuan video conference hmangin Mizoram Legislative Assembly Inthlanpui, 2023 lo awm tur atana thawh ho dan tur an sawi ho.

Kolasib Bawrhsap Pu John LT Sanga chuan video conference buatsaih chhan sawiin, Mizoram, Assam leh Tripura te chu state inramri, kawng hrang hranga inmamawh tawn a nih angin ramri hnaih district-a DC leh SP te'n thawh hona ṭha tak neiin, meeting an nei ho ṭhin a, chu chuan dan leh thupek kenkawh kawngah te, ruihhlo leh a kaihhnawih do kawngah leh ei leh bar chungchangah te hma lakna a tichakin, inpawhna leh inhriat thiamna a thlen nasa a, a ṭangkai hle a ni, a ti a. He thawh hona boruakah hian kumin February thlaa Assam Hailakandi District-a Border Festival buatsaihah Kolasib District-a sawrkar official eng emaw zat nen sawm an nih anga football team te hruaia an telpui thu te, March thlaa Kolasib-a Chapchar Kut buatsaihah Assam-a border district DC leh SP te sawm an nih a, an lo telpui thu te tar langin, border district-te inkara thawh hona ṭha tak awm mek chu chhawm nun zel a nih a beisei thu a sawi a. Mizoramah November ni 7-ah inthlan buatsaih a nih dawn avangin election process a kal chho mek tih sawiin, inthlan vuakvetah ramria venhim hna thawh kawngah te, a ṭha lo zawnga inthlan nghawng thei thil thleng tur dan chah leh ven kawngah te state ṭhenawma ramri district-te thawhpuina an mamawh tak zet tih a sawi a, hemi kawngah hian an thawhpuina a ngen nghal a ni.

Mamit Bawrhsap Pu VL Remliana pawhin state ṭhenawma ramri district-te chu ramri kana dan phal loh bungraw tawlh luh tur chungchangah te, inthlan kaihhnawiha sum fai tawlh luh chungchangah leh dan phal loh thil titute chet velna chungchangah theih tawp chhuaha venpui turin a ngen a. Kolasib Sr Superintendent of Police Pu Lalrinawma Traite chuan ramri district-a SP-te chu inthlan vuakvetah dan leh thupek kenkawh kawngah te, ramri kana ruihhlo leh dan phal loh thil chi hrang hrang tawlh luh tur ven kawngah te ngawrh zawka hma la turin a ngen a. Mamit SP Pi Lalthangpuii Pulamte leh Vairengte SDO (Civil) Pu Lalremruata Sailo te pawhin inthlanna felfai leh muanawm a awm theih nana thawh hona tura pawimawh an tihte an sawi bawk.

Assam-a Cachar, Hailakandi leh Karimganj district-te leh Tripura-a North Tripura District DC leh SP te chuan Mizorama ramri district pahnih - Kolasib leh Mamit district-te nen thawh hona ṭha tak an nei chu lawmawm an tih thu leh chhawm nun zel tlak nia an hriat thu an sawi a. Mizoram MLA Inthlanpui, 2023 lo awm turah an theihna apiangah ṭanpui an inhuam thu sawiin, an sawi hona aṭanga bawhzui tur awm apiangte chu bawhzui nghal an tum thu an sawi a ni.

He video conference-ah hian Kolasib Bawrhsap Pu John LT Sanga hi Sr SP Pu Lalrinawma Traite, Vairengte SDO (Civil) Pu Lalremruata Sailo, Bairabi SDO (Civil) Dr Lalramdintluanga leh DIPRO Pu C. Lalhruaitluanga te'n an ṭawiawm a ni.

Bawrhsap Pu John LT Sanga chuan inthlan vuakvetah ramri chu vil uluk a ṭul thu sawiin, Mizoram lam aṭangin theih tawp chhuah ni mah se, vil hneh tak tak a har dawn a, chu vang chuan ramri district dangte nena thawh hona ṭha siam a pawimawh hle a ni, a ti a. He thawh hona hian Mizorama inthlan felfai, thianghlim leh muanawm tak buatsaih a nih theih nan rah ṭha tak a chhuah a beisei thu a sawi a ni.