Champhai District Election Officer Pu Vanlalngaihsaka thu pekin vawiin khan Champhai DC Office-a EVM Strong Room hawn a ni.

He EVM Strong room hawnna huna Political party hrang hrang aiawh leh Media mite kawlkhawm hmaah DEO Pu Vanlalngaihsaka chuan Champhai District chhung A/C 5 huama 2013 a MLA inthlanpui a hman tak EVM 135, Strong room a dah thatte chu Election Commission of India-in Mizoram State Chief Electoral Officer thu neihna a pek anga hawn a nih thu leh, heng EVM 135 zinga Election Petition nei EVM 86 leh Election Petition nei lo EVM 49 te chu a za vaia enfiah a tih ruah vek a nih tur thu a sawi.

Champhai District chhung A/c 5 huama 22 Tuichang leh 24 Champhai South a hman EVM 86 te chu inthlan thubuai nei (Election Petition) EP a nih vangin Guwahati High Court-in he thubuai chungchanga thu tlukna a siam chu lungawi lohna nei emaw, Court sang zawkah a hunlaia zualko (appeal) anih loh vangin thubuai chu tihtawp a ni a. BEL leh ECIL siam EVM EP nei 86 leh EVM EP neilo 49 te chu enfiah (Physical Check up) turin leh EVM tin Serial No. te chu Election Commission of India-ah thawn thla turin vawiin atang khan heng Champhai a Election Branch hnathawktute chuan an bawhzui nghal a ni.

Champhai DC Office a EVM tinte Serial Number leh Election Commission of India in a kawlte enfiah fel anih hnuah Election Commission of India thupek angin heng EVM khawlte hi inthlanna atan hman zui anih theih nan EVM chhunga Data awmte hi nawhreh vek a ni ang.

Champhai A/C 5 huamchhungah MLA inthlanpui neih lai khan Polling Station 133 awmin, EVM khawl 2 chu thlak thleng anih vangin a vaiin EVM 135 hman a ni.