Nimin chawhnu dar 1:30 pm khan Pu Ronald Sapa Tlau, MP (RS) chuan Model Village atana a thlan Chhiahtlang khuaah High Mast Rs. Nuai 15 senga bun chu a hawng.

Nimina Model Village atana thlan an nih lawmna Village Day leh High Mast hawnna Inkhawm Chhiahtlang Bazar tuala neihah hian thusawiin, Pu Ronald Sapa Tlau chuan District Capital te pawhin an la neih loh Chhiahtlangin High Mast an nei chu a lawmpui thu a sawi a, High Mast siamna atana District thuneitute inpeknaah lawmthu a sawi bawk.

Mizorama khaw 800 chuang awm zinga Model Village ni tura Chhiahtlang khua a thlan chhan chu khaw mipuite chungah rinna a nghah ngam vang anih thu sawiin, Party feeling awm lova inlungrual taka hma la turin a chah a, chu chuam Mizo mipuite entawn tlakah Chhiahtlang khua hi a siam theih ngei a rin thu a sawi.

Model Village in a tum ber chu hmasawnna anih rualin Model Village atana hman tur sum (Budget) hran dah a ni lo erawh pawi a tih thu a sawiin, State sum atangin a remchan anga hmalak zel tuam a nih thu leh Central lam atanga dap chhuah dan kawng zel anih thu a sawi bawk.

Model Village ni tur chuan mitinin mawhphurhna an neih thu sawiin, ei leh bara intodelh tur a theihtawp chhuah turte, Faina leh Thianghlimna kawngah mai nilo, Hriselna leh Zirna kawngah te,Bukna diklo leh hlemhletna dona kawngahte leh Khawtlang nun tha leh nuam nei zel tura hma la uar deuh deuh turin a fuih.

Khual zahawm Dr. Lalrozama, IAS, Serchhip District Bawrhsap pawhin thusawiin, Chhiahtlang khuain eng tha tak High Mast an neih anga Mizoram khawdangte tan Eng chhuak tur an nih thu sawiin, Model Village an nihna in mawhphurhna a ken telte hlen chhuak thei ngei tura inlungrual taka hmala ho chho zel turin a chah bawk.

Nimina High Mast hawnna inkhawm hi Pu CR Dothanga, VCP Chhiahtlangin a kaihhruai a, Pi Rohnuni Colney, Charge Officer SAGY Chhiahtlang in Report pein, MP (RS) in MP Fund atanga Model Village Chhiahtlanga Rs Nuai 15 senga High Mast phun thar hi Nexlite Company, Guwahati ten an thawk a, 18 November, 2015 ah hna thawk tanin, 23 November, 2015 khan hman theiha peih fel a ni a, lei atanga a san zawng hi 100feet(60Metres) niin, electrict thahrui 9600watts a hmang dawn a ni.

Attachment

  • Loading attachment...