Mizoram Football Association (MFA) Executive Committee Meeting chu vawiin (December 30) chhun dar 12:00 khan MFA President Pu Lal Thanzara, Minister for I&PR office chamber-ah an inhmukhawm a, thil pawimawh tak tak an rel zingah German National Students Football Team-in Mizoram an rawn tlawh tur chungchang pawh an sawiho.
Meetingah hian German Students National Team-te hian January 5, 2016-ah Lengpui Airport an lo thlen tur thu tarlangin, he mi zan hian Chief Minister Pu Lal Thanhawla'n zanriah a buatsaih sak ang a, cultural night a hmanpui an nih tur thu an sawi a. January 6 chawhma lamah Thutak Nunpuitu Team, Muanna Veng-ah an kal ang a, naupangte nen hun an hmangho ang. January 6 chawhnu dar 3:30-ah Lammualah German Students National Football Team-te leh Mizoram XI-te'n friendly match an khel ang a; January 7 zingah MFA Grassroots naupangte hun an hmanpui zawh hnuah he mi ni chawhnu lamah German Students National Football Team-te hian Mizoram an chhuahsan dawn a ni.
MFA president Pu Lal Thanzara chuan, "Mizoramin tun hnaiah football-ah vanneihna kan chang nasa hle a, German Students National Football Team-in min rawn tlawh tur hi kan phur a, inbuatsaihna pawh chak takin kan kalpui mek a ni a ti a. Organising Committee a hranpaa din a ni a, anni hian thil pawimawh ang an ngaihtuah vek tawh a, hlawhtling takin kan mikhualte hi kan thleng thei turah kan ngai a ti a. An lo kal chhan lian ber Mizoram XI nen January 6-a Lammuala an inkhel en turin Mizoram mipuite kan sawm a ni," a ti.
Organising Committee hian Venue, Accomodation, Tickets, Programme, Publicity, Security, Medical, Ushering, Refreshments etc an rel fel tawh a; January 4 & 5-ah ticket hi an zuar tan dawn a, Rs 200, Rs 500 leh mi 300 tan ticket man to bik Rs 2,000 man siam a ni.
MFA Executive Committee hian India rama state hrang hrangte football inelna sang ber, Santosh Trophy 2016 chungchang a rel a, Santosh Trophy team-te hi ngawrh takin an inbuatsaih mek a, hunpuiah pawh chawl loin hunah hian Hawla Indoor Stadium, Republic Vengthlangah an riak lut mek a ni.
He meeting-ah hian National Junior Football Championchip for BC Roy Trophy-a Mizoram team tirh dan tur leh team enkawltu turte an ruat bawk a; Aizawl FC-in I League an khelhna tura MFA-te kawng engkima thawhpui tura an sawmna thute chhiar chhuah a ni bawk.
