1356/2022-2023

Champhai, the 26th July, 2022: State Election Commission thuchhuah angin Champhai Dinthar VC By-Election neih tur a ni a. Hemi atana inpuahchahna kalzelah vawiin chawhma dar 11:00 khan Election Officer, Pu Lalnunfela Chawngthu chuan Champhai Dinthar VC by-election draft electoral rolls, 2022 chu DC Conference Hall-ah a tlangzarh a, draft roll bu hnih theuh pollitical party aiawhte a hlan nghal a ni.

Election Officer Pu Lalnunfela Chawngthu chuan State Election Commission thuchhuah bawhzuiin Champhai Dinthar VC by-election neih tuma ruahmanna kalpui chhoh mek zel a nih thu sawiin, hemi kaihhnawiha VC draft roll tlangzarh hriatpui tura kalkhawmte chungah lawmthu a sawi a. Draft roll siam nan qualifying date atan January ni 1, 2022 hman a nih thu leh hemi huna kum 18 tlingte tan roll-ah inziahluh theih a nih thu a sawi a. VC electoral roll leh MLA/MP inthlan tuma electoral roll hmante a danglam thin avangin uluk taka VC roll-a chuan leh chuan loh thlithlai a tul thu a sawi bawk.

Election Officer chuan sawi chhunzawmin Voter's ID nei VC roll-a awm tura inngaia ngaihtha mai an awm thin thu tarlangin, VC roll chu a hran daih a nih avangin hemi a chuan loh palh awm thei a nih avangin awm leh awm loh ngaihven a ngai a ni, a ti a. State Election Commission thuchhuah angin Mizorama khaw 18 ah te VC by-election neih tur a nih thu a sawi bawk.

He hunah hian VC roll chungchanga hriattur tulte, form hrang hrang hmanga dilna siam dante bakah Polling Station dinhmun chungchangte sawiho a ni a. Hemi hnu hian Village Level Officer (VLO) training neih chhunzawm a ni nghal a ni.

Vawiina Champhai Dinthar Draft Electoral Roll tlangzarhin a tarlan dan chuan tun dinhmunah Champhai Dinthar Vengah hian vote nei mi 649 an awm a; heng zinga 294 hi mipa niin, a dang 355 te chu hmeichhia an ni. In 254 awm mekin VC seat 5; General seat 4 leh Reserved seat 1 an nei thei a. VC member 1 General seat atanga tling chu a ban tak avangin he seat bik hnawhkhat tur hian inthlan buatsaih tur a ni.

Ruahman dan chuan vawiin July ni 26, 2022 hian draft rolls tlangzarh a ni a. Vawiin atanga tanin July ni 31, 2022 thlengin claims & objections period hawn a ni a, hemi hun chhung hian roll-a inziaklut tura dilna leh thu thlen duh neite tan hun hawn a ni ang a. Thla thar August ni 3, 2022 thleng hian dilna lut leh siamthat tulte chinfel vek hman tum a ni a. Champhai Dinthar VC By-Election neih huna hman tur VC Electoral Rolls thar ber chu August ni 8, 2022 hian tlangzarh tum a ni.

He hunah hian ERO/AERO, DIPRO, Dinthar VLO, Political party aiawhte leh Dinthar Veng NGO hotute an tel a ni.