Champhai Dinthar Veng khawtlang leh UPC (NEI) te  ram inchuh buaina chu vawiin chawhnu khan DC Conference  Hall-ah District Magistrate Dr Naveen Aggarwal kaihhruaina hnuaiah  rem fel a ni.

Dr Naveen Aggarwal chuan Mizote chu remna duh hnam an nih angin Dinthar khawtlang leh UPC (NEI) ten rilru zau tak pu a inremna thu thlung an ziak  thei chu lawmawm a tih thu a sawi a. Nakin zel thlenga buaina awm lo tura inremna  siam chu thil pawimawh anih thu sawiin, remna awm theihna kawnga remna palai hna thawktu Sub-Hqtrs YMA chungah lawmthu a sawi bawk.

Inremna ang chuan tuna ram inchuh mek Land Lease chu UPC (NEI) ten Revenue Department-ah an thehluh ang a,  he ramah hian  MHIP, MUP, VC House leh Anganwadi Centre-te an awm chhunzawm ang a, UPC (NEI) te chu Dinthar khawtlang ram   ruahman sakah an awm dawn a ni. Dinthar khawtlang hruaitu leh UPC (NEI) palaiten remna siamna kawnga District thuneitute hmalakna chu fakawm an tih thu an sawi bawk.