CHAMPHAI DISTICT SILVER JUBILEE LAWMNAA KHUALLIAN CHIEF MINISTER THUSAWI

Dated 15th March, 2024

DC Office Complex, Keifang Tlang

Kan Chairman Pu James Lalrinchhana, Deputy Commissioner, Champhai district chhung MLA vawiina lo tel te, SP Pu Vineet Kumar, IPS, Head of offices leh official lo tel zawng zawng te, hunserh min hman saktu Rev.  K. Lianmunga, khawtlang hruaitu lo tel te, Party lama ka thawhpuite, tlawmngaipawl hrang hrang hruaitute, Media lama kan thian te, Champhai district Silver Jubilee lawm tura lokal khawm thian duh tak te, Jubilee chibai ka buk a che u.

Champhai district chhung Tualpui khuaa piang, Champhai khuaa inbengbel zui ta kan ni a. Ka nu leh pa leh ka u te lu nghahna hmun a ni. Chuvang chuan, mahni khua ang thlapa kan ngaih a ni a. "Mumang a pem thei lo" an lo tih thin angin Aizawla kum tam tak kan awm tawh hnuah pawh mang lamah kan la hmu fo mai a ni.

Kum 1960 chhovah khan GM High School-a zir chungin Mizo Union, Champhai Block Thalai President ka ni ve hman a. Kum 1972 Union Territory inthlan hmasa berah pawh khan ka kumin a la tlin loh avang chauhva MLA ah khan ding ta lo ka ni a. Kum 21 chauh ka la ni si a, Champhai bial MLA hmasa ber ka ni teuh khawp mai.

Kum 1972 inthlan campaign lai hian Pu Ch. Chhunga a lo zin chho va, phak tawkin kan lo buaipui a, kan lo zui a.  Aizawl a thlen thlak hian a nupui Pi Rothangi hnenah " Nu-i, Champhaiah tlangval fel deuh mai ka han chhar" a ti a ni awm e. Chu thu chu Chief Minister-a lakluh ka nih hnu lawk, nikum December ni 12-a kan nupaa Pi Rothangi kan tlawh tumin min lo hrilh a ni. UT  inthlan a han zo va,  Mizoram Chief Minister hmasaber atana lakluh a nih khan Pu Ch. Chhunga khan a PA ni turin min ko thla  ta a ni. Chutiang chuan Champhai hi Politics lama zinkawng bul ka tanna hmun, kan theihnghilh tawh hauh loh tur khua a ni. Champhai tlangval ka nih angin mimal tak pawhin in bialtu pakhat angah ka inngai a, a rem chin chinah induhsak theihna te kan nei ve a nih chuan in tan ka inhawng reng ang.

Kumin 2024-25 chhung hian DC Office tan Rs. 455.51 lakh pek a ni a, kum hmasa aiin Rs. 86.59 lakh zetin a tam zawk a ni. Tin, Champhai District jail sak thatna tur, SASCI sum atangin Rs. 750 lakh ruahman a ni a, Aizawl pawna zana inkhleh theihna hmasa ber ni turin Chhangphut Field-ah Lighting system vuah a ni dawn a. SASCI sum 445.76 Lakh hmangin tender tichhuah niin tunkar chhung hian contractor tur hi thlan fel hman kan beisei a ni. Kahrawt Community Hall sak chhunzawm nan CSR Rs. 25 lakhs dil mek a ni bawk.

Tun thla ni 8 khan Govt. Champhai College hi PM –USHA hnuaia Grants to Strengthening College atanga Rs. 5 crore dawng tura thlan a ni a, Champhai district Hospital-ah hian 50 bedded critical care block changtlung tak sak tum a ni a, hemi atan hian Rs. 2375 lakhs ruahman a ni. Integrated Public Health Laboratory changtlung tak siamna tur Rs. 125 lakhs ruahman a ni bawk. Khawbung PHC Block Public Health Unit siam nan Rs. 80.96 lakhs te, Hnahlan PHC Block Public Health Unit sakna tur Rs. 80.96 Lakhs te, Champhai Zotlanga Urban Health & Wellness Centre sakna tur Rs. 23.79 lakhs ruahman thar a ni a. Land Resources, Soil & Water Conservation hnuaia hmalakna tur Bungzung khuaah Rs. 72.85 lakhs te, Khawbung South –a hmalakna tur Rs. 80.16 lakhs leh Tlangsam khuaah hmalakna tur Rs. 57.06 lakh te ruahman fel an ni bawk.

1. Champhai district hi kan ram hruaitu pawimawh tak takte hring chhuaktu district a ni. Undivided Champhai district anga chhut phei chuan district mala MLA nei tam ber a ni hial awm e. Tuna tang lai zingah kan Home Minister Pu K. Sapdanga (Zote), Pu C. Lalsawivunga (Vaphai), Pu TBC Lalvenchhunga (Champhai), Pu Lalrintluanga Sailo, ani hi Aizawla piang ni mah se Tlangsam lal Pu Thanghlianga tupa a ni. Pu F. Rodingliana (Ngopa). MLA ni tawh te zingah CM kalchhuak ta Pu Zoramthanga (Samthang), Pu Liansailova (Leithum), Pu B. Lalthlengliana (Farkawn), Pu T.T Zothansanga (Champhai), Pu T. Sangkunga (Vanzau), Pu Lalhlira (Champhai), Pu C. Vulluaia (Tualcheng), Pu Zosiama Pachuau (Tualcheng), Pu Lalhmingliana, Ex MP (Tualcheng/Lungphunlian), Pu C. Chawngkunga (Tlangsam), Pu Aichhinga (Zawlsei). Tun hnua Khawzawl district huam chhung lo ni ta atangin; Pu Tawnluia (Khawzawl/ Zaingen), Pu Lalrinliana Sailo (Lungtan/Khawhai), Pu JH Rothuama (Chalrang), Pu R. Lalawia (Sialhawk), Pu KL Lianchia leh Pu K. Lianzuala te (Biate). Saitual District chhung lo ni ta atangin; Dr. L. Thangmawia leh Dr. ZR Thiamsanga (NE Khawdungsei), leh Pu H. Rohluna (Kawlbem) te an ni a. Sawi hmaih pawh ka la nei hial mai thei e. District ropui tak Mizoram lo kaihruai thintute hringchhuaktu, ram neitu tak takte chenna hmun a ni.

2. Mizote sulhnu hlui leh Champhai district hi a inzawm tlat a, kan ram ro hlu, historical sites tam tak kawltu district kan ni. Hei vang hian khualzin hip theihna remchang kan ngah hle. Mipuite pawh kan hmun hlui vawnhim kawngah kan tan tlan a tul hle a, a tlawhtu khualzinte dawnsawn kawngah pawh kan hawihhawm thiam a pawimawh hle. Heng kan hmunhmate tihmasawn tur hian sawrkar laipui Scheme – Swadesh Darshan 2.0 kalpui nan Aizawl district leh Champhai District te thlan an ni a. Champhai District bikah hian cheng nuai sangkua (9000 lakhs) sengin Tlangsam, Zotlang, Keilungliah, Vangchhia, Farkawn leh Dungtlangah te hmalak tum mek a ni. Kar hmasa maiah khan Swadesh Darshan leh Prashad Scheme hnuaia project thar 43 leh project thawh tawh 9, Prime Minister in Online in a rawn hawng a. An zingah hian Rs. 5.59 crore senna tur Vangchhia pawh a tel a nih kha.

3. Champhai District hi Zonun ze mawi – tlawmngaihna fir berna hmun tia sawi a ni thin a, Zofate hmun hlui tam tak kawltu nihna nen pawh a inhmeh hle. Vawiin thlengin district mipuiten kan la nunpui zel em tih te ka hre phak tawh lo va.  Kan hnam nun ze mawi tak takte hmuh theiha a la awm zelna district ni thei ila ka duh hle mai. Chutianga kan awm thei a nih ngat chuan Mizo hmun hlui leh nun hlui mawi tak tak kawltu kan ni dawn tihna a ni a. Kan hmun leh nun te hmanga mite hip khawmtu, midangte zirtirtu kan ni dawn tihna a ni. 

Sumdawnna lamah hnam dang, a bikin vai awm ve lohna khua a la ni zel pawh hi a lawmawm hle. Chutih rualin, hnam dangte tel ve lohna hi remchanga hmangin, mahni mizopuite hnena to uchuak taka bungraw zawrh nan kan hmang hlauh ang tih erawh chu a hlauhawm ve thei tho awm e.

4. Burma ram politics buaina avanga sahimna zawnga an rawn tla thla, kan unaute lo dawng hmasatu district kan ni a. Hemi kawnga khawtlang leh kohhrante hmalakna hi fakawm ka ti a, lawmthu ka sawi a ni. Kan unaute lo tuamhlawm hi kan tihtur a ni a, thlamuang takin a tul chen chen kan hnenah an awm turah pawh ngai ang. Chutih rual chuan, ram ralmuang tak kan nihna hi nghet taka vawnhim zel kan tum tlat a. Kan ralmuanna bul chu ram leh khawtlang dan mipuiten kan zawm that vang leh inzahtawn taka kan chen ho vang a ni. Kan unaute pawhin hei hi min hriatsak a ngai a, kan dan te tha taka lo zawm turin ka chah a ni.

India leh Burma ramri hi British sawrkarin a chhunga cheng mipuite min rawn lovin, kan hnam tana tha tur ngaihtuah tel miah lovin, an rorelna atana awlsam tur chauh ngaihtuah chungin - divide & rule policy - hmangin an kham a, barh luih ramri a ni. Prime Minister Pu Narendra Modi hnenah te, Home Minister Pu Amit Shah hnenah te leh External Affairs Minister, Civil Service-a ka batch mate Dr. S. Jaishankar hnenah te pawh hei hi ka thlen a. Tun hnaia ramri hung an tumna pawh kan pawm theih loh thu leh Free Movement Regime thlenga kan tana pawm a harsat thu ka hrilh a ni. Kan duhaisam zawk chu rorelna pakhat hnuaia zofa zawng zawngte awm khawm hi a la ni reng.

5. Champhai hi ‘Rice Bowl of Mizoram’ tia chhal ngam a ni a, Mizoram economy-a hmun pawimawh luahtu a ni. Undivided Champhai (Khawzawl District leh Saitual District-a khaw thenkhat) anga chhiar phei buhfai leh thlai thar chhuah tam lamah Mizorama hmahruaitu kan ni hial awm e. Kan leilette keimahni ngeiin kan siam deuh vek bawkin ka hria a, a lawmawm zual hle. Kan thlai thar chhuahte pawh ram pawn thlenga thawnchhuah te a awm ta hial mai. Champhai, Ngur leh Samthang khuaah te NABARD sum hmangin Collection Centre sak kan tum mek a, Cold Storage te pawh dah kan rilruk a ni. Hmasawn zel kan la mamawh avangin thlai chin theihna ram kan neih te kan vawnghim ang a, tuihna tha kan neih reng theih nan kan ram ngawte veng himin, kan theihna tipung turin tunlai thiamna thar ber ber te nen hma kan la chho zel dawn nia. Kan sawrkar hian kan crop pattern hman mek hi National Food Security Mission hmangin awmze nei lehzuala thlak kan tum a, hmalakna hi cluster base deuh zela kalpuia, tanky te pawh hman tlak tak tak lo te tak te te siam lova, Community Tank ang zawnga siam te kan rilruk a ni. Tuipui tuilianin kan leilet zawl thalaite a tihchhiat zel loh nan Tuipui Anti-Erosion Scheme, Rs. 21.15 crore man tur tunah hian DPR kan thehlut mek nghe nghe a. Irrigation & Water Resource Department hnuaia hmalakna hi Champhai district ah hian kan ngah hle a ni.

Tin, Champhai District chhunga Sanghate hi a tui bik em em mai a, a hmun hi a zo vang emaw ni dawn ni? Sangha kan tharchhuah tam theih nan district chhungah hian Hatchery pakhat siam zawh tawh a niin, a dang pakhat siam mek a ni a, tihbelh zel kan tum a ni.

6. NE India pumpuia Grape Wine siamna awm chhun neitu kan ni a, Grape  tharchhuah tam lamah pawh NE India ah chuan a thar tam ber kan nih hial ka ring. Tun hnai mai khan Champhai leh Hnahlana Grape chingtute leh Wine siamtute nen ka office-ah inkawmna kan lo nei tawh a. Heng kan winery pahnihten hma an sawn zelna tur ruahmanna hrang hrang sawiin, chhungkaw tam takte eizawnna a nih tawh avangin sawrkar chuan a thlahthlam dawn lo va ni.

7. Indo- Myanmar Border Trade kawngkapui a ni a, he border trade hi mumal taka kalpui theih hun a nghahhlehawm hle. Mizo sumdawngten dan ang thlapin bungrua han chawlutin India ram zau zawkah han zuar chhawng se la, reiloteah Champhai district hi International trade centre lian takah a chang mai dawn a. Chu hun thlentir tum chuan a theih ang angin hma kan la zel ang. Tunah erawh chuan ruihhlo leh adangte tawlhrukna kawngpui a ni mek a. Ruihhlo supply a tam avangin kan thalaiten an chhiatpui nasa hle. Kan sawrkar lakluh a nih ni khan mahni in pawh pan lovin Champhai pa, Pu TT Zohmingthangate nupa enkawl, TBCC ka zu tlawh a. Thalai hnathawk rual, hna thawk thei lova ruihhlo bawiha tang mi 860 zet an lo thu nghuk mai a ni! Home dangah pawh za tam tak an la awm bawk. A lungchhiatthlak takzet. Kan rama ruihhlo lut nasa lutuk hi kan tihtawp thuai loh chuan kan hnam tana pawi khawpin min sawp chhe thei hial dawn. Ram leh hnam hmangaihtu chuan tha thlah lova ruihhlo kan do a ngai  a ni. Kan Home Minister, Pu K. Sapdanga leh Excise Minister, Pu Lalnghinglova Hmar te pawhin kan dinhmun chhiatzia hi hriain, Office an luah hnua an official tour hmasa berah Champhai district an rawn fang a nih kha.

Ruihhlo bawiha tang mekte chhanchhuak turin sawrkar pawhin hma a la a. Policy leh dan tharte duangin a bultanna atan Budget-ah Rs 50 lakhs dah a ni. Kohhran hrang hrang aiawhte nena inrawnkhawmna te pawh kan buatsaih a, ram pawn lam mi thawhpui turte kan dap a, Presbyterian Church of USA aiawhte nen inkawmin, an ruahmanna rawn siam kan ngaichang mek a ni.

8. Thangthar tha zawk din tura tih makmawh hmasa chu zirna tha neih a ni a. Kan thalaite hi zirna tha ber kan pek chuan khua leh tui tha ber kan chherchhuak dawn tihna a ni. Thawkchhuaktu ni tura inbuatsaihna tinreng te, nunphung dik zawh thei tura inkawhhmuhna te, nitin zirna kawngah te district kan nih rualpuite kan phak em tih hi inzawt nawn fo ila a tha awm e. Zirna lam sawi apiang hian sawrkar hmalakna duh khawp lohna thinlung neih hi a awl phian a, a dikna chen pawh a awm a ni. Kan sawrkar pawhin kan hria a, ruahmanna kan duang chho mek a. Tuna ka sawi duh zawk chu, thiamna tak tak nei tur hian a zirtute zawk hian engtiang chiahin nge kan beih ve tih lam hi a ni. A zirtuin a zir phawt chuan sikul tha tak tak ni lem lo atang pawhin mi hlawhtling leh tangkai tak tak hi an chhuak tam tawh mai. Tun hma deuhva kan mi hmasa te, sikul thaa kal ve phak lo, thawhrimna hmanga hneh chhuha Civil Service tling ta hi Champhai district atang pawh hian kan nei nual a ni. Kei pawh hi Chief Minister PA ni chunga  lehkha ka zir ve hram hram thin ka ni a. Tunlaiah Internet atanga engkim kan haichhuah a, kan hriat zung zung theih tawhna khawvelah, hriatna hnar a awlsam hle tawh hnuah pawh hian Central Service hi kan tling hlei thei tlat lo mai a. Taihmakna leh tumruhna kawngah kan pachhe ta ni te hian a hriat a ni.

9. Ka kaihhruai sawrkar hian tun sawrkar kumah Hand Holding Policy kalpui nan budget ah Rs. 200 crore kan dah a, hei hi a hmahruai mai a la ni. He Policy in a tum ber chu khua leh tui tupawh, eizawnna khawp theihna leh thiamna nei, hmalakna tur hriate an bana kaia dinchhuahtir a ni.  A then chu thlai tharchhuah lama hmalakna a ni ang a, ran vulh lam mir te pawh an ni ang. A then chu Mistiri lam te, bungbel leh hmanraw dang siam chhuah te, eitur siam chhuah te, Information technology behchhan hmalakna te; eng hmalakna pawh eizawnna tling, tharchhuaktu hlawhtling ni thei apiangte chu sawrkarin an banah kaiin kan hnuk dawr dawr dawn a ni. A thlawna sem emaw a thlawna dawn tumna thinlung tireha mahni thawhchhuah ngei hmanga dinchhuah i tum ang u.

10. Inrelbawlna tha, fel taka dan leh hrai kenkawhna, hmasawnna khai rual leh mitin huapzo sawrkarna a awm theih nan district hrang hrangah then kan ni a. Chu district nihna hlu tak chu Champhai pawhin kum 1998 atanga nei tanin vawiinah a kum sawmhnih leh pangana kan lawm a ni. District kan neih hnua hmasawnna kan hmuh tam tawhzia pawh mita hmutu vek kan ni. India ram huapin lawmman te pawh kan lo dawng fo mai. Kumin January thlaah pawh Champhai Police Station chu India rama Police Station tha ber palinaah thlan a ni a, security lama in thawh that avangin Election Commission Award in dawng bawk a. Nikum lamah District Hospital fai lawmman te in lo dawng tawh a, kawng dangah pawh lawmman ropui tak tak in lo la fo tawh tih ka hria a, ka lawm hle a ni.

Mizoram district pawimawh ber te zinga mi, kan ram rohlu tam tak kawltu, hmun pawimawh tak (strategic location) luahtu kan nihna hre chungin kan kal zel ang a. Hmasawnna inkhairual, tha taka ram dan lekkawhna, khua leh tui zawng zawngten ngaihsak an hlawhna district nih zel kan tum dawn nia.

Mipuite pawhin mahni zawnah mawhphurhna kan nei tih kan hriat a ngai. Kan chanvo lam hi chiang takin kan hre duh viau a, a bawhzuina lamah pawh kan tuan hi a tha tlangpui vek mai. Kan mawhphurhna lam lo mangnghilh daih erawh a awl viau thei a. Khua leh tui tha nihna hi mahni chanvo um chakah a innghat ber lo va, mahni mawhphurhna (responsibility) hlen lamah zawk a innghat lian em em a ni.

Silver Jubilee lawmna ropui tak buatsaihtute chungah lawmthu ka sawi a, Pathian khawngaihna a zarah tluang taka Champhai district hi a kal zel ka beisei a ni.

Ka lawm e.