Mizoram mipui duhtakte,

CHIBAI 

Hlim leh lawm taka  kan Ram ropui takin Independence  Day vawi 78-na a lawm ni pual hian duhsakna chibai ka buk a che u. He hun pawimawh takah hian kan ram tana Zalenna sualtu mi inpekna zahawm tak kha kan thinlungah a rawn thar leh a. Ram pumpuia khua leh tui te rualin  kei pawhin kan hnam pasalthate kha zah takin chibai ka buk a ni.

Kan Prime Minister  zahawm tak Pu Narendra Modiji chuan kum 2047-a Viksit Bharat nih kan tum thu a puang a, Viksit Bharat kan neih theih nan Viksit Mizoram nih kan tum hmasak a ngai a ni. Hemi kawngah hian Mizoram mipui zawng zawngte chu ram changkang nih kan tumna ti hlawhtling tura theihtawp chhuah tur leh thawhpui atan ka sawm a che u.

Mizoram Larsap hna kum thum lai ka lo thawk ve ta reng mai tih ka hriat  hian  ka lawm hle a. Hemi hun chhung hian kan State leh kan Ram hmasawnna kawngah te ka phak tawkin ka theihtawp ka chhuah ve a. Hemi hun chhung hian kawng  hrang hrangah Mizoramin  hlawhtlinna lian zawk kan thawk chhuak thei tih hi ka hmu chiang tawk a,  kan thiam, theihna te leh  kan thil neih te hmang tangkai  hian thil tam tak kan tihlawhtling thei tih ka ring tlat a ni.

Kan hriat vek angin sum leh pai lama harsatna tawk State kan ni a, resource mobilization pawh kalpui a awlai lem lo. Hetiang hi kan dinhmun a nih tak avangin  mipui vantlang ten Central Sawrkar hnuaiah social security scheme tam tak a awm tih kan hriat a ngai a ni. Heng scheme hrang hrangte hi a kaihhnawih thuneitute, bank leh official dangte hnen atanga zawtfiah turin mipuite ka chah nghal bawk a ni.

Kan State tana hmasawnna ruhrel lian tham zawk te din ti harsa em em tu pakhat chu inkalpawhna kawngpui tha tawk lo lai hi a ni a. Hei vang hian Bairabi-Sairang Railway line siam zawh hun tur a nghahhlelhawm takzeta, achhan chu he Rel Kawng hian kan state hmelhmang a la rawn  thlak danglam dawrh dawn a ni. Chutih rualin Central sorkar atanga sum tam tak Kawngpui siamna atan kan dawng chunga kawngsiam hna tam zawk te kan zo hlei thei lo hi a pawi ka ti takzet a. Kan dam khawchhuahna kawngpui kan tih mai, Vairengte-Sairang National highway 4-laning a la tangkhang ngat phei hichu a pawi zual a,  kan chhut thiam phak bakin min ti thuanawp mek a ni. Kawngpui tha neih hmasak hi hmasawnna ruhrel lian dang te din tura thil pawimawh hmasa ber a ni tih i hre tlang the ang u khai.

‘Atmanirbhar Bharat’- Inida ram intodelh tura hmalakna atan  hian sector hrang hrang atangin tha kan thawh ve thei turah ka ngai a. Entir nan Hriak chang thlai chi thar chhuah leh Sangha Vulh te hi kan tih theih tura chiang saah ka ngai a ni. Fisheries  huangah te hian hlawhtlin theihna lian tak kan nei a, tualchhungah hlawk takin a hralh theih piahlamah kan state thenawmah te pawh man to zawkin a la hralh theih leh zel a ni. Hemi huanga inhnamhnawih kuthnathawktute  zawng zawngte chuan phur takin he hmalakna hi luhchilh turin thurawn ka pe  nghal bawk a. He hmalakna atan bik hian Central sawrkar atang pawhin sumfai tanpuina a dawn theih a ni.

Power sector hi kawng pakhat kan intodelh leh theihna ni si, kan la tihhlawhtlin theih loh a ni a. Power intodelhna atana bul kan tanna ni turin  Mizoram mipui zawng zawngte chu Central sawrkarin subsidized rooftop solar scheme - PM Surya Ghar Muft Bijli hi lo zirchiang theuh  turin ka ngen a. He Scheme hnuaia  Central subsidy hi State Sawrkar chuan mipuite tana phhurrit chhawk zangkhai turin State subsidy in a rawn vuak thuah a, a lawmawm takzet a ni. PM Surya Ghar Yojana, chhungkaw tin te current bill tihniam thei tura scheme duan hi  ti hlawhtlingtu kan nih chuan  kan chhehvel ti chereu lo zawnga Kawlphetha siam chhuahna kawngah thawktu pawimawh tak kan ni thei a ni.

Hmasawnna chungchang kan sawi lai mek  hian remna hlutzia hi kan hriat fo a ngai a. Kan State hi ram pahnihin min hual a, kan thenawm ram pahnih te hian tunah hian politics lamah buaina nasa tak an tawk mek a ni. Hetih lai hian keini chu tharum thawhna tuipui in min hual vel mahse  remna thliarkar ang main  kan awm reng a. Hei hi Mizoram mipuite kan inchhuanna tur niin ka ngai a, he remna hlu tak kan nei hi kan vannei bik a, a vawng nungtu ni tlat tur pawhin kan in ngen nawn leh e.

A tawp ber atan chuan kan zalenna sualtute’n an thil tum leh beiseina ram   tih hlawhtlin tumin an martar a. An inpekna hlutak leh an thil tum te kha  vawng nung reng  turin kan zavaiin inhlan thar leh ila. Viksit Bharat leh Viksit Mizoram tihhlawhtling tu nih vek i tum ang u.

Independence Day Chibai ka buk nawn leh a che u.

KA LAWM E.

JAI HIND.