MSACS bultuma National AIDS Control Programme (NACP) leh Champhai District AIDS Prevention and Control Unit (DAPCU) in District Level National AIDS Control Programme thutkhawm vawiin a Champhai District Hospital ICTC Counselling Centre-a buatsaih-ah Mizoram chhung District pariat zingah Aizawl District chu HIV hrikpai tam berna niin, Champhai District chu a dawttu a nih thu tarlan a ni.
He thutkhawmah hian North East Regional Co-ordinator Pu Gautam Salam leh Team Leader In-charge Pu Pankaj Choudhury te bakah MSACS Deputy Director Dr. Malsawmtluangi Ralte ten Champhai District chhunga District AIDS Prevention and Control Unit (DAPCU) thawktu peng hrang hrangte hnenah HIV/AIDS dona kawnga nasa leh zuala tan lak a tul thu tarlangin, Champhai District chu thisen endikna atanga HIV hrikpai tam tak hmuh chhuah anih vangin zau zawk a tanlak dan ruahman atul leh HIV hrik a darh zau zel lohna tura mipui nawlpui nen thawhho dan kawng dap atul thu tarlan a ni bawk.
HIV/AIDS chungchang thutkhawm vawiin a neihah hian India ram a HIV hrikpai tamlam tehna (Nu naupai atanga HIV hrikpai hmuh chhuah) HIV Sentinnel Surveillance 2012-13 in a tarlan danin Mizoram State chu India ram a HIV hrikpai tamna ber pahnihna (2nd) niin, mi 100 zela .68 (0.68%) in pai anga chhut a ni a, Nagaland chu HIV hrikpai tamna ber (0.88%) a nih thu tarlan a ni bawk.
Mizoram bikah HIV hrikpai (HIV positive) tehna hnuhnung ber tih chhuah danin kumin January atanga May thla thleng khan Champhai District chhungah mimir thisen 1,105 leh Nu naupai 790 thisen endik atangin mi 44 ten HIV hrik an pai thu tarlan a niin, thisen endik zingah mi 100 zela 2.3 (2.3%) in HIV hrik an pai thu he hunah hian tarlan a ni.
North East Regional Co-ordinator leh MSACS hotute hian nimin khan District AIDS Prevention & Control Committee Chairman Champhai DC Pu H. Lalengmawia hmu in, Khawzawl BDO Office-ah Champhai District a HIV/AIDS dinhmun thlirin an thukhawm a; hemi chungchangah hian chak zawk leh koritu zawk a hmalak dan tur ruangam pawh ruahman nise tha an tih thu an sawi.
