273/2024-2025

Champhai, the 18th April, 2024: Lok Sabha Inthlanpui, 2024 naktuk April ni 19, 2024 a neih tur atana Champhai District chhunga Assembly Segment 3 a Polling Station 84 a inthlan buaipuitu tur, Polling Party 84 te chuan vawiin khan an duty-na tur theuh an pan.

Polling party-te hi District Election Officer Pu James Lalrinchhana chuan vailiamin duhsakna a hlan a. Champhai District hminga inthlan buaipuitu turte chu tluang taka kal a, mawhphurhna an neihte tha taka hlen turin a chah a. Tihfel ngaite an zawhfel hnuah District Hqrs. him dam taka an lo thlen leh vek a beisei thu a sawi a. Inrintawkna leh rinawmna nena inthlan buaipui tura chahin, harsatna an tawh palh thulhah tanpui tura an inpeih reng bakah hemi tur hian ruahmanna tha tak siam a nih thu a sawi a. Thlamuang tak leh nuam ti taka an duty theuhte hlenchhuah tum turin a fuih nghal bawk.

Polling party chhuak turte hi DC Office tuala Assembly Segment tin tana a hranpa zela buatsaih Issuing and Receiving Counter-ah dawnsawn niin, inthlanna bungrua leh tul angte an tihfel hnuah an chhuak a ni. Polling party chhuak hmasa ber hi 23/1 Selam Polling Station-a duty turte niin zing dar 9:30 ah an chhuak a, a hnuhnung ber a chhuak 23/21 Keifangtlang Polling Station-a duty turte chawhnu dar 2:20 ah an chhuak fel a ni.

Champhai District chhunga Polling Station 84 zinga 9 te hi hmeichhe hlang vil tur 'Pink Polling Station' a ni a, heng bakah hian thupui behchhana siam theme based Polling Station 3 siam a ni bawk.