Vawiin chawhma dar 11:00 khan DC Conference Hall-ah Champhai District a Kuthnathawktute Ni hman dan tur chungchang Champhai DC Pu Lalthangpuia Sailo kaihhruai-in ngaihtuah a ni.
Kuthnathawktute Ni hi Champhai District huapin Champhai Venglai Community Hall-ah ropui taka hmang turin ruahmanna duan a ni a, he ni-ah hian Champhai District huapa a NLUP hamthatna dawngtute zinga hnathawk tha ber chhungkaw 3 te chawimawina hun hmang tura tih a niin, Champha District atanga State Level atan a thlan chhuah chhungkaw 3 te hnenah pawh chawimawina thuziak leh sumfai hlan tura tih a ni bawk.
Champhai a Kuthnathawktute Ni hmanna, Champhai DC Pu Lalthangpuia kaihhruai a neih turah hian All Mizoram Farmers' Union (AMFU) leh Hnamchhantu Pawl aiawh a thu sawi ngaihthlak a ni dawn a, Mizoram sorkar in Khuallian tura a ruahman hnen atangin thusawina ngaihthlak anih dawn bakah Zaithiamten hun an hmang dawn a, thingpui ruai tuihnai tak siam a ni bawk ang.
He Ni hi ropui taka hman anih theih nan Champhai District chhunga AMFU memberte, NLUP hamthatnadawngtu zawng zawngte , NLUP Line Department te, sorkar Department Head te leh Gazette Officerte chu tel ngei tura tih an ni a, he ni hman tur pual hian Champhai khawlai-ah Banner tar nise tiin vawiin a committee chuan a rel bawk.
