Vawiin chawhma dar 10:00 khan Serchhip D.C office chamber-ah Serchhip District Addl. D.C. Pu Lalsangliana, MCS hovin NLUP Line Departments hotute, Serchhip khawchhunga Village Council hrang hrang leh tlawmngai pawl hrang hrang aiawhten karleh January ni 16, 2013 a Serchhip riaka tlawh tur University of Minnesota, USA a expert team te lo dawnsawn dan tur an rel ho a, nimin khan Serchhip District chhunga Serchhip khawpui pawn zokhua an tlawh tur chungchangah heng khaw hrang hrang khawtlang hruaitu te nen hian an lo thukhawm tawh bawk a ni.

Ruahman lawk ang chuan mithiam rualte hi January ni 16, 2013 ah Serchhip an riak ang a, January ni 17, 2013 zing dar 7:00 ah YMA Reserved Forest an tlawh ang a, dar 9:30 A.M. ah Serchhip khawtlang hruaitu leh tlawmngai pawl hrang hrang hruaitute bakah, Sawrkar official te nen inkawmhona hun an hmang ang.

Expert Team ten Serchhip District khawchhung hmun hrang hrang an tlawhna ah hian Line Departments te chu anmahni tawiawm zel tura tih an ni a, Line Departments te chu expert team te hnena hlan tur NLUP hnuaia an Department hmalakna write-up leh thlalak mumal taka lo buatsaih theuh tur a tih an ni bawk. Serchhip Sub-Headquarters YMA pawh Social Forestry an kalpui dan kimchang leh an hlawkpuina te expert team te hnena report pek tur uluk taka siam tura ngen an ni a, expert team te nena inkawmhona hunah hian Serchhip khawpui huamchhunga Sawrkar Department hrang hrang hotu ber (Head of Departments) te tel vek tura tih a ni bawk.