3080/2024-2025
Champhai, 19th November 2024: Champhai District-a naupangte chawchhun pekna, PM Poshan kalpui tha zualte hnenah vawiin khan chawimawina hlan a ni.
Samagra Shiksha, Champhai District buatsaihin chawimawina hlan pual hian Education Training Hall-ah hun hman a ni a. Pi Laldingliani Ralte, Dy DPC kaihhruaiah hian Pi K.Lalsiamliani, DPC, Samagra Shiksha, Champhai District chuan thu sawiin, PM Poshan hi Champhai District-a sorkar school 140 chuangah kalpui a ni a. A titha thlan chhuah school 10 te chu an entawn tlakin an chhuanawm hle a ni, a ti.
PM Poshan atan hian school-in Convergence Cost an dawn khat em em karah zirtirtute leh hnathawkte inpekna leh tanrualna te, nu leh pate inpekna avangin zirlaite tan chawchhun buatsaih theih a la ni hi a ropui leh zual a. Naupangten school kal ni apianga an ei theihna tur te, chaw tha leh an ei duh ngei siamsak kawngah te tanlak chhunzawm zel a pawimawh tih a sawi bawk.
DPC chuan zirtirtu kalkhawmte chu PM Poshan kalpui kawngah hian thil tha, intihhmuh leh entawn tlakte ching chhuaktu-a tang turin a fuih a. Nu leh pate nena thawhhona bakah khawtlang leh tlawmngai pawlte pawh tanrual a ngaihna hrilh harhtu ni turin a sawm a ni.
Champhai District-a PM Poshan an kalpui tha zualah hian school 10 thlan chhuah an ni a. Hengte hi zirtirtu Association ten tehfung hrang hrang endik lehin pakhatna atanga pathumna an thlang a. Chungte chu: 1) Govt Mualkawi PS, 2) Govt Zawlsei MS leh 3) Govt Kanan MS te an ni.
