Vawiin khan DC Conference Hall, Champhaiah NEDP-Tourism hnuaia Rural Homestay Scheme kalpui dan tur sawi ho a ni a. Pu CC Lalchhuangkima, Addl. DC, Champhaiin kaihruaiin Pu J.H. Rothuama, MLA & Chairman, NIB in a tel pui a.  Tourism Department aiawh officer te bakah Champhai district chhunga he scheme hmanna turin a huam RD Block-a BDO te an tel bawk. 

Rural Homestay Scheme hnuaiah hian Champhai hi Pilot District niin khaw paruk – Vangchhia, Dungtlang, Vaphai, Zokhawthar, Hnahlan leh Chawngtlai khua te thlan an ni a. Heng khuaah hian chhungkaw thlanchhuah ten mikhual thlenna tur pindan / in sa in mikhual an thleng thei ang a, ram chhung leh pawn atangin a duh apiang heng khuaah te hian riahchilha an ram chhehvel fang tur leh an nunphung leh khawsak anga va khawsaa hun va hmang thei turin ruahmanna siam a ni. 

 9th June, 2017 hmain hmalak pui tur chhungkua thlan fel a ni ang a, September 2017 ah chuan he scheme hnuaia insak tur te sa zo vekin October ah training neih pui an ni ang a; November 2017 ah chuan a taka hman theih tura inpeih hman tum a ni. A huamchhung khaw bialtu BDO ten heng hna hi enpuiin Tourist Officer, Tourism Deptt. chu Nodal Officer tur a ni. 

Meeting hmanpuitu Pu J.H. Rothuama chuan he scheme hnuaia mihring thlan chungchangah fimkhur a tha tiin a bial chhunga official te a ring tawk tih a sawi lang a. mikhual thleng thei tur chi leh hetiang lama tui mi chhungkua thlan chhuah thiam a tha tiin he scheme hi a hlawhtlin a duh thu a sawi a ni.