Vawiin chawhnu dar 2:00 khan Hawla Indoor Stadium Conference Hall-ah Mizoram State Sports Council (MSSC) term kal mek (2014-15 to 2016-17) General Body Meeting hnuhnung ber neih a ni a. He meeting hi Sports and Youth Services Minister, MSSC President ni bawk Pu Zodintluanga a kaihruai a ni.
Meeting ah hian Mizorama sports hmasawn dan leh hmasawnna tura ruhrel duan mek kalpui dan te sawiho a ni a. Sports and Youth Services Minister chuan thuhma sawiin MSSC hnuaia Sports Association 31 hmalakna leh hlawhtlinnate a tarlang a. Sports hmasawnna tura Mizoram sawrkar hmalakna hrang hrang te chu Sports Association ten an tangkai takin an hmang mek a ni, a ti a. Infiamna lama hmasawnna tura sawrkar laipui policy pawimawh Urban Sports Infrastructure Scheme (USIS) 2012-a tan a nih rualin Mizoram Sports Department-in rang takin a bawhzui a, he policy hnuaia Mizorama scheme 5 kalpui te chu tun dinhmunah zawh fel an ni tawh tih kalkhawmte a hrilh a. Hun reilote chhungin MSSC hmalakna leh hmasawnna thangduang tak chuan mi ram beng hial thlengin Arunachal Pradesh sawrkar aiawhten zirchiang turin MSSC an tlawh a, North East Council Director pawh MSSC kaltlanga NEC Project thawh zawh tawh leh thawh mek enin a lo kal bawk a ni, Pu Zodintluanga chuan a ti. Mizoram hmun hrang hrangah sports infrastructure siam mek a ni a, khawpui lianah chauh ni lovin thingtlang khaw te zawkah pawh siam a ni tiin sports-a thalaite tuihalna phuhru turin MSSC chuan chak takin hma a la mek a, a la chhunzawm zel dawn a ni, a ti bawk.
MSSC Secretary Pu C.Laltlanthanga’n kum thum chhunga MSSC hmalakna report a pe a. Mizoram khawpui lian thenkhat khelmuala phullem phah te, Sihhmuia Cricket Stadium sak te, Kolasib-a Regional Sports Training Centre te, Ramhlun Sports Complex Boxing Hall, Mualpuia Dengthuama Indoor Stadium te, Republic Venga Taekwondo and Powerlifting Hall te, Zemabawka Judo Hall te, Bunghmun khuaa Indoor Stadium te, Thenhluma Indoor Stadium te, Aizawla Semi Indoor Tennis Stadium siamte bakah Lunglei LDSC Ground-II a Outdoor Artificial Climbing Wall siam te chu an hnathawh langsar zual Secretary in a tarlan zingah a tel a ni.
MSSC General Body meeting-ah hian games and sports association hrang hrang aiawh an tel kim hle a. Kum kal mek 2017-2018 chhunga an hmalak dan tur chhawpchhuahte thlirin hmalak dan tur an rel nghal a ni.
