Vawiin chawhnu khan Champhai DC Pu Vanlalngaihsaka, District Sanitation Task Force Chairman nibawk kaihhruaiin DC Conference Hall-ah Champhai District Sanitation Task Force thut khawm a ni a. He thutkhawmah hian India ram khawpui lian zual ten faina kawnga hma an lak chhunzawm dan tur hmachhawp hrang hrang sorkar laipuiin, Swachh Survekshan 2018 hmang a chhawp chhuahte tarlan a ni.
India ramin faina kawnga hma a sawn zel theihna tura a hmalakna, Ministry of Housing and Urban Affairs buatsaih Swachh Survekshan 2018 kal tlang hian India ram puma khaw 4,041 te chu thlanchhuah an ni a. Mizoram chhung khawlian zual 23 zingah Champhai District chhunga khawpui lian zual 4: Champhai, Khawzawl, Khawhai leh Biate ten fainna kawnga tehna hrang hrang, sorkar laipuiin a siamte hlen chhuah anih theihna turin engtiang a lo inbuatsaih tur nge tih thlirho a ni a, faina kawnga tehna hman tur tam tak zingah kan rama awm velo leh hman theih loh thahnem tak a awm thu he thutkhawmah hian sawi lan a ni.
2018 kumtir hian Sorkar laipui atanga mithiamten fainna kawnga khaw lian deuhte hmalak dan an rawn enfiah turah zawhna leh tehna pengtinte chhang thei tur leh enfiah theih tura inbuatsaih dan tur tarlan a nih bakah Nodal Department (UD & PA) leh heng khaw palia nodal officer ruat te chu ruahmanna fel tak siam tura tih anih bakah khawtlang hruaitute, tlawmngai pawl leh mimal tinte tanrualpui a sawm thiam a pawimawh thu pawh tarlan tel a ni bawk.
Swachh Survekshan 2018 atana chak zawka hmalak a tul thu DC chuan sawiin hemi kawngah hian nodal officer tinte chu anmahni bial theuha hmala turin a chah a. Hmalakna leh hnathawhte thlirhona remchang hmasa bera nei leh tura rel a ni bawk. Swachh Survekshan hi bung thum heng; Service level progress, Direct observation leh citizen feedback-ah te then hran a ni a. Central atanga mithiam lokal ten endikna leh mipuite hnen atanga zawhna te an rawn nei dawn a ni. Heng stage tinte hian mark keng telin inelna a kalpui tura ruahman a ni.
