Project Pushpak, Border Roads Organisation chuan kumin November 29th atanga December 1st chhung hian an kum 50 din champha an lawm dawn a. He mi pual hian 30th November, 2017 hian Sipai Lammual-ah Cultural Extravaganza buatsaih a ni dawn a, Pu Lal Thanhawla, Chief Minister chuan he hun hi a hmanpui ang. He hun chhim tur hian Project Pushpak chuan mipuite a sawm a ni.

Cultural Extragavanza bakah Golden jubilee lawmna pual hian martyr te puala hun hman a ni anga, Inter-unit sports competition, medical leh blood donation camp bakah thildang tam tak buatsaih a ni ang. Cultural Extragavanza bikah hian Mizo hnam lam hrang hrang te, Gymnastics, Sikh Martial Arts te bakah rampum huapa lam thiam lawmman dawngtu te lam entur a awm dawn a ni.

Project Pushpak hi Mizoram kawng tihmasawn turin 1st December, 1967 khan Aizawlah din tan a ni a, tun thleng hian kawng 3600km an siam tawh a ni. Tun dinhmunah Project Pushpak  Chief Engineer Brig Birender Singh hnuaiah hian Task Forces pathum : 24 BRTF, Seling, Mizoram; 765 BRTF,Uchasthal, Manipur leh 46(I) Task Force, Port Blair, Andamans & Nicobar Islands an awm mek a ni. Kum 50 a din chhung hian Project Pushpak hian Kirti Chakras pali, Padmashri pakhat leh Shaurya Chakras 23 te a lo dawng tawh a ni.