Lawngtlai District-a chhiatna a lo thlen thulha rang taka chhanchhuah hna thawh a nih theih nana ruahman Disaster Response Vehicle leh hmanraw hrang hrang chu DM&R Minister Pu C. Ngunlianchunga chuan vawiin khan Lawngtlai DC office tualah hman tan theih turin a tlangzarh.

Tlangzarh hnua Lawngtlai DC Conference Hall-a inkhawm tawi buatsaihah Pu C. Ngunlianchunga chuan chhiatna venna kawnga Lawngtlai District-in hmasawnna hmel thar a hmu leh ta chu lawmawm a tih thu sawiin, a hlawhtlin nana thawktute chungah lawm thu a sawi a. Kawng tinrenga Lawngtlai District-in hma a sawn chhoh zel theih nan sawrkar department hrang hranga hotute chu an hma zawn theuhvah theih tawp chhuah turin a ngen nghal bawk. Chhiatna thlen thulha hma lak dan tur leh inven dan hriat a pawimawh thu sawiin, inzirtirna tam zawk buatsaih a, naupangin an than hnan theih tura inzirtir reng a tul thu a sawi a. Sawrkar pawhin chhiatna kawnga invenna lam chu a ngai pawimawh hle tih sawiin, hemi kawngah hian State Disaster Response Force (SDRF) hnuaiah police leh tlawmngai pawl mi eng emaw zat zirtirna pek an ni a, mi tam zawk zirtir belh zel tum a la nih thu a sawi. SDRF fund atanga za zela 5 (5%) chu hmanrua leh bungraw lei nan dah hran a ni a, department hrang hrang pawhin an budget atangin eng emaw zat chu chhiatna laka invenna atan an dah hrang tur a ni tiin, chhiatna avanga kan in leh lo leh rohlute kan chan palh thulha thlaveng atan leh lukhawng nei turin insurance (dahkham) tih nachang hriat a pawimawh hle a ni, a ti bawk.

He hun hi Lawngtlai District Bawrhsap Dr Arun T., IAS chuan a kaihruai a. DM&R Nodal Officer Pu Lalrinawma MCS chuan District Disaster Management Authority-in disaster management lama hma lakna thar a neih leh thil thar a tawn te bakah, hma lak chhoh zel dan tur te a sawi fiah a. Lawngtlai SP Pu Lalsanglura MPS pawhin thu sawiin, Addl DC Pu H. Dolianbuaia MCS chuan lawm thu sawiin hun khar a ni.

Vawiina hun hmanah hian Minister tawiawmtu LADC-a Executive Member Pu C. Lalneihkhuma te, Planning Board Vice Chairman Pu Suresh Chakma leh Lai DCC President Pu J. Ropianga te leh Lawngtlaia sawrkar department hotu thahnem tak an kal khawm a ni.

Lawngtlai District hian tun hnaiah chhiatna laka invenna kawngah hmasawnna thar a nei nual a. Khuarel chhiatna thlen theitu thlipui, ruahpui leh lirnghing lo thleng tur sms hmanga inhrilh darhna (disaster alert system) ruahman niin, hemi hmang hian tlawmngai pawlte, chanchinbu mite, sawrkar official-te leh VC te chu inralring tura hriattir lawk an ni thin dawn a. Chhiatna thlen thulha thuneitu lam hriattir nghal vatna turin a thlawna biak pawh theihna (toll free number) 1077 chu ruahman ni bawkin, hei pawh hi hman theih reng a ni tawh bawk.

Hei bakah hian DC office motor hman lai (gypsy) chu chei thain, disaster response vehicle atan buatsaih a ni a. Hemi rual hian chhiatna hrang hrang – lei min, in chim, kangmei leh tui tla an awma hman tur hmanraw tha tak tak lei thar niin, disaster response vehicle-ah hian tlan chhuahpuia hman nghal mai theihin chhawp a ni ang. Hmanraw lei thar zingah hian tui tla chhar nana hman tur tui chhung luhna thuam famkim (full set of scuba diving suit) te, concrete leh thing lianpui pui tan bung thei tur thil zaina te, zana current awm loh pawha eng atan hman theih tur tower light generator te, hruizen lian leh fei chi te pawh a tel a ni. Lawngtlai District hi Mizorama district pariat zingah disaster response vehicle nei thei district pathumna niin, scuba diving set phei chu nei hmasa ber nia hriat a ni.