Vawiin khan Inter-Departmental Coordination Committee (IDCC) on Civil Registration System (Births & Deaths) chu an chairman Dr.C.Vanlalramsanga, Chief Registrar of Births & Deaths leh Planning & Programme Implementation Department Secretary hovin Planning & Programme Implementation Department, Conference Hall, Aizawl-ah an thukhawm.

Vawiin meeting-ah hian registration unit thar din chungchang te, Medical Certificate of causes of Death (MCCD) kalpui dan te leh district tina zirtirna inpek te sawiho a nih bakah, Mizoram a piang leh thi zat zawng zawng dik leh rintlak taka chhinchhiah anih theih nana hnathawh dan te, harsatna tawh te leh chung harsatna te sutkian a nih theih dan tur an sawiho a; certificate diklo siam leh dan lova certificate a thuziak lo thlak awm thin thu ah mitin mawhphurhna a nih thu leh kan fimkhur tlan a tul zia sawilan a ni a. Birth Certificate tlai khawhnu a dil te mahni ngei inlana dilna thehluh tur anih thu te, tlai khawhnu a dilte an dilna leh lehkha pawimawh a dik tawk em tih enfiah zung zung anih theih nan leh district hranga in ziahluh thuah a awm loh nana digitization a hmalakna te sawiho a ni bawk a. Hei bakah hian certificate lem siam a awm loh nan tuna hman mek hologram/holistic bakah QR code te dah tel nise tiin Committee chuan a rel a. Hei bakah hian District Research Officer tin te chu fimkhur lehzuala birth certificate pechhuak turin Committee chuan a ngen a. Sorkar hna thawh rei duh vang te, sports intihsiaknaa tel duh vang te leh chhan dang hrang hrang avanga pian kum diklo a Birth Certificate thar siam tum te, India khua leh tui nilo ten thildang atana an hman tangkai duh vanga Birth Certificate dil mai te, Sorkar puihna leh hamthatna um avanga mitthi tawh pawh dam anga la ziah tum tlat te dilna chu hnawl zel turin Committee chuan DRO tinte a hriattir a ni.  

Committee chuan a hun taka birth certificate leh death certificate buaipui thin turin mipui te a ngen a ni. Tun dinhmunah Mizoram pumah registration unit 843 a awm mek a ni.