Sorkar laipuia Ministry of Textiles-in District Handloom Fair buatsaih tura ruahmanna a siam angin Mizoram Apex Handloom and Handicraft (MAHCO) chuan vawiin atang khan Champhai Town Hall-ah ni thum chhung awh turin Fair hi neih tan a ni.

District Handloom Fair hawnna hi MAHCO Ltd. Managing Director Pu Lalrinsanga'n kaihruaiin, Co-operative Societies Additional Registrar Pi Lalfakzuali chuan vawiin chawhma khan a hawng a. MAHCO Ltd. in mahni kutkawih dehchhuah puan leh inbelchi thawmhnaw hrang hrang hmun hla zawk a cheng mipuite lei theih tura phochhuahna hun an buatsaih thei chu fakawm atih thu a tarlang a. Pi Lalfakzuali chuan eizawnna hmun khat intelkhawm hian chak leh zualna a thlen theih thu sawiin, Co-operative Societies hminga hmalak anih hian sorkar lamah pawh hamthatna kawng tam tak a awm theih avangin hetiang lama eizawng tuten timna nei lova Co-operative-ah hian inziaklut a, mahni nihna dik tak tarlang ngam turin MAHCO Ltd. memberte chu a chah bawk.

Champhai Assistant Registrar Co-operative Societies Pu Zaliankhuma leh MAHCO Ltd. Manager Pu K. Rothawmliana ten Fair hawnna hunah hian thu an sawi bawk a ni.

Champhai District Handloom Fair-ah hian Dawr 20 chuang hawn a niin, Zirtawp thleng neih a ni ang.