2289/2026-2027

Champhai, dated 21st September, 2026: Vawiin chawhnu khan DC Conference Hall, Keifangtlangah Civil Registration System (CRS) of Births & Deaths hnuaia District Level Coordination Committee (DLCC) meeting neih a ni a. Pu Mohammad Aaquib,  DC leh District Registrar ni bawkin a khaihruai a, Pu Lianhmingthanga, Addl  District Registrar of Births & Deaths leh District Research Officer ni bawkin an hnathawh dan leh hmalak tawhna report a pe a ni.

 He ṭhutkhawmah hian Champhai District chhunga piang leh thi chhinchhiahna (Registration of Births & Deaths) hna thawh dan hrang hrang te uluk taka thlirho niin, registration system tun aia chak leh ṭha zawka kalpui dan turte sawiho a ni.

Champhai District-ah hian registration unit 67 (Institution 8 leh Local Unit 59) a awm mek a, live birth registration tawh zat chu 70,072 niin kumin September 20, 2026 thleng khan nau piangthar mi 1,084 ziahluh tawh a ni a. Kum 2024 RBD Annual Publication-ah birth rate chu 27.64 niin, district mipui 75.3% in birth registration an ti tawh a ni. Mitthi ziahluh  tawh zat chu 8,886 niin kuminah hian mitthi 353 ziahluh a ni a, death rate hi 9.83 a ni a, Infant Mortality Rate (IMR) chu 7 niin State-ah a sang lam aṭanga chhutin 5-na a ni mek bawk.  Kumin chhungin Non-Availability Certificate (NAC) 2,079 pek chhuah tawh niin Delayed Registration Order hrang hrang pawh DC leh ADR hnen aṭangin siam a ni tawh a, Medical Certification of Cause of Death (MCCD) hi Institution RBD Unit ten E&S CRS Branch-ah direct-in an thawn ṭhin a ni.

Birth leh Death Certificate siam turin mi a pian emaw a thih atanga ni 21 chhungin RDB-ah a thlawna ziahluh theih a ni a, ni 22 aṭanga 30 chhungin Rs. 50 chawiin, ni 30 aṭanga kum 1 chhungin Rs. 100 chawiin ziahluh theih a ni. Pian leh thih aṭanga kum 1 a liam hnuah chuan Delayed Registration dil a ngai a, dilna form Rs. 50-a lei hnuah DRO/ADR Office-ah Rs. 40 chawiin NAC lak a ngai a, chumi hnuah DC leh District Registrar aṭangin order hmuhin local unit-ah Rs. 100 chawiin ziahluh tur a ni.

Digitization of Birth & Death Certificate hi kum 2015 atanga kalpui tan a ni a,  September ni 20, 2026 thleng a digitized/ computerized tawh zawng zawng hi 7,602  a ni a, registration ti tawh zawng zawng a atanga chhutin 11% a ni. Digitization hi hun tiam awm lo a, a duh tan ADR hnen aṭangin dil theih reng a nih rualin tuna la digitized loh certificate te hi ala nung reng a ni.

Meeting-ah hian Pu Lalchhuanawma Ralte SDC, District Research Officer, UDC DRO Office, District Education Officer, Chief Medical Officer, DCSO, leh DIPRO, DPO aiawh te an tel a ni.