2951/2024-2025

Champhai, 13th November 2024: Vawiin khan Champhai District Education Reforms Committee buatsaihin Education Training Hall, Champhai Kahrawt Vengah Education Reforms Campaign neih a ni a. He hun hi Prof. Lalbiakdiki Hnamte, Working Chairman, Mizoram Education Reforms Committee (MERC) leh Rev. Dr. K. Thanzauva, Consultant, School Education Department; MERC member ni bawk te'n an hmanpui a ni. 

He hunah hian Prof. Lalbiakdiki Hnamte, Working Chairman, MERC chuan MERC hnathawh leh kalphung sawifiahna hun a hmang a. Mizoram sawrkar thar chuan zirna siamṭhat chu a tum lian ber pakhat a nih thu sawiin, he mi kawnga hmalakna pakhat atan MERC chu din a ni, a ti. Sawrkar sum tihek lova zirna siamṭhat dan ngaihtuah chu an din chhan pawimawh tak pakhat a nih thu pawh Prof. Lalbiakdiki Hnamte hian a sawi a, sawrkar term kal lai kum 5 chhung ngei hian zirna kalphung mumal zawk committee hian a hrinchhuah theih ngei a beisei thu a sawi bawk a ni. 

Mizoram Education Reforms Committee hi February ni 21, 2024 khan Mizoram sawrkar chuan Mizorama zirna dinhmun te zir chiang a,  hmasawnna leh hmalakna ṭha zawk a awm theih dan tur ngaihtuah tura din a ni a. He Committee-ah hian School Education Department Minister Dr. Vanlalthlana chu Chairman a ni a, Prof. Lalbiakdiki Hnamte, MZU chu Working Chairman niin, Pu R. Lalthanmawia, Dy Director (Rtd), School Education Department chu Member Secretary a ni. MERC member-ah hian Prof. Vanlalhruaii, Principal (Rtd.) IASE; Dr. Tawnenga, Principal, Mizoram Christian College; Dr. Rohmingmawii, Associate Professor, PUC leh Rev. Dr. K. Thanzauva, Education Consultant te an awm a ni.

Education Reforms Campaign hi thawh hnihah ṭhen a ni a. Chawhma hun hi Pi K. Lalsiamliani, District Education Officer chuan kaihruaiin, kalkhawmte inlawmna hun leh inhmelhriattirna hun a hmang a. School Education Department Consultant, MERC member ni bawk Rev. Dr. K. Thanzauva chuan thu sawiin tumna tak tak a awm chuan, hlawhtlinna a awm ṭhin tih hre reng turin zirtirtu kalkhawmte chu a chah a. Zirtirtute chu hruaitu pawimawh tak an nih angin, hmathlir leh tum (mission & vision) mumal tak an neih a ṭul a, heng an thil tum tihlawhtling tur hian ruahmanna felfai (strategic planning) an neih a pawimawh a ni, a ti. Rev. Dr. K. Thanzauva chuan zirna a tlukchhiat chuan ram a tlu chhia a, zirna siamṭhat chu mitin ten an phak tawk ṭheuhah an kalpui a ṭul a ni, a ti bawk. 

Chawhnu hunah hian Prof Lalbiakdiki Hnamte chuan zirna siamṭhat (Education Reforms) thupui hmangin thu a sawi a. MERC hruaitute leh Champhai DEO/SDEO hnuaia zirtirtu kalkhawmte hian inkawmhona hun ṭha tak neiin, zirna siamṭhat dan tur an sawiho a. Pu Lalthlamuana Tochhawng, SDEO, Champhai chuan lawmthu sawina hun hmangin, Education Campaign hi a khar a ni.