2950/2024-2025

Khawzawl, dated 13th November, 2024: Vawiin chawhma dar 11:00 a.m khan DC Meeting Hall-ah kumin Krismas leh Kumthar inkar mipui te'n thlamuang taka hun an hman theih nan dan leh hrai kenkawh dan tur rel ho turin hruaitu hrang hrang te an thukhawm a, Addl. DC, Pu Lalfakzuala'n meeting hi a kaihruai a ni.

He hunah hian hruaitute chuan halpuah leh khawtlang tibuai thei hrang hrang khapna dan chhuah tha an ti a, zu leh ruihhlo vanga buaina chhuak thei veng turin VDP ruat a duty post siam tul an ti bawk. Heng duty te hi VC leh YMA te nena thawk ho tur an ni ang a, mipui leh khawtlang tibuai thei tur zu rui leh mipui ti buai thei te an khap dawn a ni. Khawtlang faina vawng turin veng tin te tan lak a tul tih an rel bawk a, mipui lam pawh tang turin fuih zel ni se tiin an rel bawk a ni. Police leh magistrate duty turin ruat ni se an ti bawk a, heng duty te hi VDP leh YMA te nen thawk hoin an hna an vil dawn a ni. Chairman Pu Lalfakzuala chuan he thu pawimawh tak rel tura lo kal zawng zawng te chungah lawmthu a sawi a, Krismas leh Kumthar mi tinin hlim tak leh thlamuang taka an hman theih nan theihtawp chhuah turin a fuih bawk a ni.

He hunah hian Pu Timothy R. Lalhmangaiha, BDO; Pu C. Vaninmawia, SDPO; YMA hruaitute, VC member te leh taxi leh maxicab association hruaitute an tel a ni.