2949/2024-2025
Dated Lawngtlai, 13th November 2024 : District Disaster Management Authority (DDMA) bultumin vawiin chawhma dar 10 khan Lawngtlai District-a 'Mock Exercise on Floods and Landslides' neih tur atan 'District Level Table Top Exercise' chu DC Conference Hall-ah neih a ni a. Pu Cheemala Siva Gopal Reddy, IAS, bawrhsap leh Chairman, Lawngtlai District Disaster Management Authority ni bawk chuan thutkhawm hi a kaihruai.
Pu Cheemala Siva Gopal Reddy, IAS, chuan North East leh a bik takin Mizoramah ruahtui tla nasain leimin leh chhiatna dang tam tak a thlen fo thin a ti a. Hetiang dinhmuna awm kan nih avangin Chhiatrupna (Disaster) lo thleng thei lakah nunna chân lo tur leh, thil tihchhiat a tam lohna tura inbuatsaihna tha nei turin 'Mock Exercise' neih chu thil tul leh tangkai tak a ni, a ti. Chhiatrupna a lo thlenin sawrkar department hrang hrang leh Tlawmngai Pawl ten mawhphurhna lian tak an nei tih hriatchian a tul a; mahni mawhphurhna tha taka hlen thei turin naktuka 'mock exercise' neih turah theihtawp chhuah a tul tak zet a ti a. Bawrhsap chuan mock exercise neih turah a tak tak anga engkim kalpui a nih dawn avangin mawhphurhna neite chu tih tak zeta an hna chanpual theuh hlen turin a chah.
Pi Margaret J. Vanlalremmawii, SDO (S) chuan Mock Exercise kalpui dan tur tlangpui (Sequence of Action) sawifiahna a nei a. Mawhphurhna bik nei zingah Responsible Officer- Deputy Commissioner, Head Observer - Project Director, Incident Commander - Addl. Deputy Commissioner, Nodal Officer - SDO (S), Site Incident Commander - Dy. Commandant, 3rd IR Battalion, Thingkah, Information Officer - DIPRO leh Site Observer- CYLA te an nih thu a tarlang.
Mock Exercise hi naktuk ni 14, November, 2024 zing dar 10 atang neih tan a ni dawn a. Mock Exercise on Landslides hi Kaladan Multi-Modal Transit Transport Project (KMMTTP) Road-ah neih a ni ang a, Mock Exercise on Floods hi Bajeisora, Chawngte (CADC) ah neih a ni ang.
