Nimin khan Champhai DCSO Office bultum District Level Food Security Act, 2013 chungchangah hamphai District chhunga VC hotute leh Selection Committee-a Secretary te training buatsaih a ni a. He hun, Champhai Venglai YMA Hall-a buatsaih hi Pu Lalkunga Sailo, Champhai DCSO chuan kaihruaiin, Food Security Act hnuaia Civil Supplies lama thawkten an tih tur leh hriattur pawimawh hrang hrangte bakah mipuote chanvo chungchangah nilengin inzirtirna neih a ni.

Food Security Act 2013 hnuaiah hian beneficiaries thlan dan tur chu Urban Area-ah 48.60% leh Rural area-ah 81.88% ani ang a. Hei hi 2011 census population rinchhan a thlan tura ni a. Thlan tur zat duan hian AAY family member-te pawh a huam a ni.

Food Security hnuaia thlan te chuan thla khatah mi pakhatin buhfai Kg 5 an dawng thei dawn a. Hei hi kg 1 Rs 3 hisap a ni ang. Hei bakah hian thla khatah kg 3 kg zel mi pakhat tan APL Rate-a sem a ni bawk ang. AAY chhungkua te chuan chhungkaw khatah kg 35 zel thla khatah kg 1 cheng 3 hisap in an dawng thei dawn bawk a. A bak, Food Security hnuaia thlan loh zawng chuan APL buhfai thla khat a mi pakhat tan kg 8 kgs zel, kg 1 Rs. 15 man hisap in an dawng ve thung dawn a ni.

FCS&CA Department in Supply Ration a sem reng reng ah puitling leh naupang thliar hranna a awm tawh dawn lo a ni. FCS&CA Department in Ration Card a siam te hi Supply Ration sem nan bak, awmna hmun chhinchhiah na (address proof) leh thil pawimawh dangah hman phal a ni tawh dawn lova. Food Security Act 2013 hi kumin November thla atanga hmang hman tura hmalak mek a ni.