3489/2022-2023

Champhai, the 6th February, 2023: Champhai District Level Fire Prevention Committee buatsaihin ‘Kangmei Ven Hapta’ (Fire Prevention Week) tum 24-na, February ni 6 atanga ni 10, 2023 thleng awh tur chu vawiin khan Champhai District-ah hman tan a ni. Kangmei Ven Hapta hawnna hun Govt. Champhai College (GCC) Multipurpose Hall-a neih hi District Bawrhsap Pu James Lalrinchhana, Chairman, District Level Fire Prevention Committee ni bawk chuan hmanpuiin, ‘Kangmei ven hi mitin mawhphurhna a ni' tih thupui hmanga kangmei ven hapta hman tur chu a hawng a; SDRF atanga lei kang thelhna bungrua Champhai Fire Station hnenah a hlan a, kangmei ven inzirtirna puala hla inphuahsiak tithate hnenah lawmman a sem hnuah kangmei ven chungchang inzirtirna music video a tlangzarh nghal bawk.

District Bawrhsap Pu James Lalrinchhana chuan kangmei ven hapta chu engvanga kum tina hman tul nge a ni tih inenfiah angaih thu sawiin, nikum chhungin Mizoramah kangmei chhuak avangin mi 15 an thih thu leh mi 11 ten hliam an tawrh thu a sawi a. Chenna in 34 kang ral awmin cheng vaibelchhe 23.68 hu bungrua a kangral thu a tarlang a. Fire Prevention Week puala hun hman chuan kangmei chhuak thinte ngaihthah mai tur anih loh thu leh, fimkhur loh leh suahsual avanga chhiatna thleng theite do kawngah tanrual a tul thu min hriattir se a duhawm hle ang, a ti a. Kangmei ven hapta hnan chhunga District Level Fire Prevention Committee in hmalakna tur a duante tarlangin, VC, NGO, Kohhran leh Media-te chu kangmeiin chhiatna a thlen dante leh inven dante zau zawka puang tam turin a fuih a; kan zavaia thawhhona lo chuan kan hlawhtling thei dawn lo a ni, a ti bawk.

District Bawrhsap chuan sawi chhunzawmin, India rama kangmei chhuah nasatna district 25 zinga Champhai District a tel chu vanduaithlak a tih thu sawiin, hmasawn ngaihna kan la ngah hle mai a, kangmei chhuak thin hi ngaihthah mai lova kan lak thutak hle a ngai a ni, a ti a. Pathian thil siam dangte duat thiama environment hmangaih chungchanga ngaihtuahna siam thar a pawimawh thu pawh sawiin, kan tan leh nakin zela kan tu leh fate tan a ni tih hriain ram ngaw leh nungcha humhalh kawnga a taka kan pen chhuah a hun tawh hle a ni, a ti a. Ram mai bakah in lamah kangmei venga thangchhuah tum turin District mipuite a ngen a; chhiatna thlen thulha thuneitute hrilh hre nghal zung zung turin a fuih a. Kangmei laka himna tura inzirtirnate ngaipawimawha zawm theuh turin a chah bawk a. Hlawhtling taka kangmei ven hapta Champhai District-ah hman anih theih nan leh, thapui thawha kangmei chhuk tur ven anih ngei theih nan kangmei ven hapta chu a hawng a ni.

He hunah hian Pu Lalduhthlana, DFO Champhai & Member Secretary, District Level Fire Prevention Committee chuan report a pe a. Kalkhawmte chu kangmei ven kawnga hmahruaitu leh midangte kawhhmuhtu ni theuh turin a sawm a. Kangmei hluar hun thal lai chu nungchate inthlahpun hun lai anih avangin nungchate suat thei kangmei ti chhuak lo tura fimkhur turin district mipuite a chah a. Nikumah Mizoram pumah kangmei chhuak tum 3,248 a thlen thu leh ram hectare 8,029.95 a zau a kangral thu a sawi a. Champhai District bikah nikum chhungin ram tum 209 kangah lo, mimal ram leh vantlang ram hectare 3,205 a zau a kan ral thu leh, forest ram kang tum 1 thlengah ram hectare 38.08 a zau a kan chhiat thu a sawi a. Ram kang kaihhnawihah FIR 1 thehluh anih thu leh pawisa chawitir mi 1 a awm thu a tarlang bawk. Govt. Champhai College campus chhunga dah tur Artificial Nest Box 10 pek tum anih thu sawiin, College Library-a dah tur lehkhabu 5 a hlan nghal bawk.

Pu F.Lalchhandama, Station Officer, Fire & Emergency Services, Champhai hnen atangin kangmei chhuah chhan leh thelh mih kawnga hmalak dan tur inzirtirna ngaihthlak a ni a. Kum 2022 April thla a?anga vawiin ni thlengin Champhai khawpui chhungah In kang pathum a awm tawh thu leh, hemi avanga bungraw kangral hlut zawng chu Rs 4,88,000/- anih thu a sawi bawk.

Vawiin kangmei ven hapta hawnna hun hi Pu P. Lalhmingliana, Principal, Government Champhai College chuan a kaihruai a. Pu C.Lalhnunpuia, Member, MJA Champhai District kaihhruaiin kangmei ti chhuak lo tura intiamna lak a ni a. Dr. R.Lianmawia, CMO Champhaiin lawmthu sawiin hun a khar a ni.

He hunah hian kangmei ven inzirtirna puala hla inphuahsiak result puan niin lawmman sem chhuah a ni a, lawmman dawngtute chu;
1) Pakhatna: Pu T.Lalnunzama, Champhai Venglai, 'Zoram Rohlu' - Rs 10,000/- & Citation
2) Pahnihna: Tv V.Malsawmtluanga, Ruantlang, 'I ram chhanhim ta che' - Rs 7,000/- & Citation
3) Pathumna: Pu SB Khualdothanga, Sesih, 'Senmei hrang' - Rs 5,000/- & Citation

Kangmei ven hapta leh kangmei huar hun chhung hian kangmei laka fimkhur tura inzirtirna, kangmei ven tangkaina leh kang thelh kawnga hriat tur pawimawhte leh tulte a zau thei ang bera mipuite thlengpha ngei tura puanchhuah tum a ni a; media hrang hrang, poster, VC leh YMA te nena thawk hovin inzirtirnate kalpui tum a ni. Zirna in leh Sawrkar Pisa-a thutiam chhiarchhuah tur siam a ni bawk a, Block Level leh Village Level-ahte BDO hovin VC leh NGO te'n inzirtirna an kalpui dawn a. Kangmei ven kawnga dan leh hraite sawihona hun Police leh EF&CC Department-te tangkawpin an buatsaih dawn bawk. Huan, Leipui leh Lo hal turte chu Sawrkarin dan a siam zulzuia mei kawng sial theuh tur te, kawngpui vat chhuak lo tur leh March ni 13, 2023 aia tlai lova hal hman vek tura hriattir an ni.

Inzirtirna nipah fawmin Airgun leh Ulhbun inkahsiak February ni 25,2023 hian huaihawt a ni dawn a. District chhunga High Sçhool Zirlaite tan 'Champhai District chhunga ram kang chhuah tam chhan, a nghawng tha lo leh tih nep dan tur' tih thupui hmanga essay inziahsiak huaihawt tum a ni a, March ni 15, 2023 hmaa thehluh tur a ni. Kangmei ven kawnga thawk tha khua/veng pathumte hnenah lawmman pek ani dawn a. Heng bakah hian kangmei ven kawnga inzirtirna chungchanga nitin chhuak chanchinbu thawhhlawkte tan lawmman siam a ni bawk ang.

Kum hnih dan zela tihchhuah thin India State of Forest Report (ISFR) 2021 tarlan danin Mizoram pum zau zawng atanga chhuta za zela 0.74 chu ngaw dur chhah tha (very dense forest) a ni a, ngaw dur chhah tha lutuk lo (moderately dense forest) za zela 26.11 a awm a, ram hring chin kan tih forest cover zau zawng chu za zela 84.53 a ni. Undivided Champhai District-ah ngaw dur chhah tha Sq. Km 55.36, ngaw dur chhah tha lutuk lo Sq. Km 942.9 leh ram hring pangngai Open Forest Sq. Km 1375.63 a zau awm anga chhut a ni. Undivided Champhai District bika ram hring zau zawng forest cover area chin chu ram zau zawng atanga chhuta za zela 74.53 a ni. Kum hnih kalta 2019-2021 chhunga Mizoram puma ram hring (Forest Cover) kan hloh zat chu Sq. km 185.51 a ni a; heng zinga Sq. Km 113.90 a zau chu Undivided Chanmphai District chhunga thleng a ni, kum 2019 report ah pawh khan Sq. Km 115 lai chan tawhin hei hi Mizorama hloh zat za zela 54 (54%) a tlingpha a ni. India rama ramngaw hausakna (growing stock) chawhrual chu 56.60 cubic metre per hectare (cum/ha) anih laiin Mizorama ram ngaw hausakna chu 38.60 cubic metre per hectare (cum/ha) a ni thung.