3490/2022-2023

Aizawl the 6th February, 2023 : Vawiin khan Blessino Nursing School chuan Taxation Conference Hall, MINECO-ah 4th Capping & Lamp Lighting & 1st Graduation Ceremony an hmang a, he hun hi Minister of State for Law & Judicial etc. Pu TJ Lalnuntluanga'n Khuallian niin a hmanpui.

Kalkhawmte hmaah thu sawiin khuallian Pu TJ Lalnuntluanga chuan nursing chu eizawnna zahawm tak leh ringtute tan phei chuan Isua rawngbawlna chhawm nung zeltute zing a mi an ni, a ti a. Pathian thuin "Nang malsawmna ni ang che" tia min zirtirna a taka nunpuitute an ni hi a ropui a, mi khawngaih theihnate, thlamuantu nihnate, dawhtheihnate, hmangaihna te nena damlote enkawl thintu an ni chu an chhuanawm tih sawiin, damlote leh an chhungte tan an tawngkam chhuak pakhat ringawt pawh thlamuan sawng sawng theihna a ni tih hre reng a an damlo enkawlte zingah tumah en hrang lo turin a chah a ni.

Nurse hna chu inpekna thuk tak nena thawh ngai a ni tih sawiin, zirlai an nih atangin taimakna, tumruhna leh tawrhchhelna nen an zir a ngai a, rilru paukhauh tak leh inrintawkna nen zir a tul tih sawiin, nurse hna hi hna nuam a ni lova, midangte tana insenralna hna a nih avangin rawngbawlna anga ngaih loh chuan tlin a har a ni a ti bawk. Nurse zirchhuakte chu hna an hmuh hunah inthlahdah lo tura chahin Mizoram pawnah leh ram dangah pawh tumruhna nena thawk chhuak turin a fuih a, Mizo te ziaa bet tlawmngaihna leh mi harsa zawk te tanpui zel duhna thinlung chuan Mizo Nurse te chu khawi hmunah pawh fak leh doctor tam tak te pawhin damlo enkawl atan an duh bik thin a ni, a ti bawk a ni. Blessino Nursing School atanga zir mek leh zirchhuak te chu inpekna tak tak nena thawk zel turin duhsakna a hlan bakah hlawhtling tura teirei peihna leh an hna tha tak a an thawh theihnan an hriselna ngai pawimawh zel turin a fuih bawk a ni.

Vawiin programme ah hian Blessino Nursing School zirlai 30 te chu Pi K. Lalbiaknguri, Nursing Superintendent SRHF-ZMC in lukhum (cap) khum tirin, bati a chhit kaisak a, hemi hnu hian Nurse thutiam an sawi a. Blessino Nursing School atanga zirchhuak (graduate) hmasa ber mi 25 te chu Pi R. Lalchhanhimi, Principal, Blessino Nursing School in graduation certificate a hlan bawk a ni.

Blessino Nursing School, Maubawk hi kum 2019 a din niin Mizoram Nursing Council pawmpui a ni a, tunah hian Indian Nursing Council pawmpui ni tura hma lak mek a ni. Kum tin zirlai 30 lak thar thin niin, tun dinhmunah zirlai 93 an awm mek a ni. Zirlaite hian Adventist Hospital, Civil Hospital Aizawl, Aizawl Hospital, Greenwood Hospital, ZMC, Kulikawn Hospital leh State Cancer Hospital, Zemabawk ah te practical duty an nei thin a ni.