3491/2022-2023

Aizawl, the 6th February 2023: Governor Hari Babu Kambhampati chuan vawiin khan Raj Bhavan-ah 1 Mizo Air Squadron a mi, NCC Cadet pahnih chu kumin National Cadet Corps (NCC) Republic Day Camp (RDC) 2023 intihsiakna neih zawh takah an hlawhtlinna te avangin a chawimawi.

Corporal Kenny Lalrinawma Singh, 4th Semester Dept of Chemistry, Pachhung University College leh Corporal Laltlansangi, 4th Semester, Dept of Geology, Pachhunga University College, 1 Mizo Air Squadron NCC Cadet te chu kumin RDC 2023 a tel tura thlan zingah lawman dawng thei awmchhun an ni a. RDC 2023-ah hian Corporal Kenny Lalrinawma Singh chuan Directorate General NCC Medal a dawn bakah Cultural (Group Song) intihsiaknaah pakhatna a hauh a. Corporal Laltlansangi pawh Prime Minister Rally(Cultural) leh NCC Cadet te tana Drill pawimawh ber zinga mi Line Area ah a tel phak bawk a ni. He hunah hian Brigadier Arun Uniyal, Silchar Group Commander, Squadron Leader MK Singh, 1 Mizo Air Squadron,Commanding Officer, Warrant Officer HZK Vanlalsawma, 1 Mizo Air Squadron, Adjutant leh Official dang ten NCC Cadet pahnih te hi an rawn tawiawm a ni.

Governor Hari Babu Kambhampati chuan Mizoram atanga RDC 2023 intihsiakna a titha fal - 1 Mizo Air Squadron NCC cadet pahnih te chu an hlawhtlinnaah a lawmpui tih lantir nan thuziak leh lawmpuina thilpek a hlan a. He hlawhtlinna hian Mizo thalai tam tak a chawh phur a beisei tih a sawi a. Mizo thalaite zingah officer leh Sipai pangai anga Indian Armed Forces zawm tu an pun zel theih nan NCC hotute chu zirtirna uar turin a chah a. Mizo thalai theihna sang tak tak nei te zingah hian inchhuang taka Indian Armed Forces zawmtu an pun chhoh zel a beisei tih a sawi bawk a ni.

January 02, 2023   khan 74th National Cadet Corps (NCC) Republic Day Camp (RDC) 2023 chu Cariappa Parade Ground, Delhi Cantt ah neih tan niin thla khat chhung he camp hi neih a ni. RDC hi NCC Cadet te tana program pawimawh ber pakhat a ni a. Kumin  RDC ah khan India thian tha ram 19 ten an thalaite an rawn tel tir a ni. Kumin RDC ah khan Cadet  2,155 an awm a; chung zinga  710 hmeichhia an ni a. India hmarchhak atangin Cadet 120 an tel a ni.

Attachment

  • Loading attachment...